Një operacion policor i koduar “Morina” është kurorëzuar nga policia e Kukësit dhe forcat speciale RENEA, duke vënë në pranga një person të shumëkërkuar për vrasje gjatë një grabitje në shtetin grek.
Mbi bazën e informacioneve të siguruara në rrugë operative, gjatë orëve të para të mëngjesit të sotëm, në fshatin Morinë, u bë e mundur kapja dhe ndalimi i Burim Durakut, 31 vjeç, banues në fshatin Morinë, Kukës.
I riu ishte shpallur në kërkim, pasi Gjykata e Kukësit ka vendosur masën e sigurisë “Arrest në burg” për veprat penale “Vrasja me dashje”, “Armëmbajtja pa leje”, “Vjedhja me dhunë” dhe “Kalimi i paligjshëm i kufirit, në bashkëpunim”.
Gjatë operacionit, forcat RENEA, kanë ushtruar kontroll në banesën e tij, ku kanë gjetur dhe sekuestruar në cilësinë e provës materiale një armë zjarri pistoletë, një armë gjahu, dy palë dylbi dhe fishekë luftarakë.
Duraku akuzohet se më 26 mars 2010, në vendin e quajtur Argostoli të Kefalinias, dyshohet se shtetasi Burim Duraku një shtetaseje greke, ndaj të cilës kanë ushtruar dhunë fizike dhe psikologjike, si dhe i kanë marrë një sasi monedhash.
Më datë 6 prill 2010, në vendin e quajtur Trapezaki Livathi te Kefalinias, dyshohet se Burim Duraku, në bashkëpunim me shtetasin Sh. D., kanë thyer derën e banesës së një shtetasi grek, ku kanë marrë sende me vlerë.
Më datë 16 prill 2010 në vendin e quajtur Argostoli te Kefalinias, dyshohet se këta dy të dyshuarit kanë hyrë në banesën e një shtetaseje greke, të cilën e kanë lidhur dhe kërcënuar me thikë dhe pasi i kanë marrë një sasi lekësh, janë larguar duke e lënë me gojë të mbyllur.
Më datë 1 maj 2010, në vendin e quajtur Argostoli te Kefalinias të Greqisë, Burim Duraku, në bashkëpunim me shtetasin Sh. D., të maskuar janë futur në banesën private të shtetases greke A. V. Pasi kanë tentuar pa sukses të shpërthenin me një mjet të mprehtë derën midis kuzhinës dhe sallonit, e cila ka qenë e kyçur, e kanë thyer derën dhe janë futur brenda. Aty kanë gjetur shtetasen greke A. V., të cilës i kanë lidhur duart dhe këmbët me një shirit vetëngjitës. Më pas kanë grisur me thikën një copë xhakete dhe e kanë mbështjellë me shiritin vetëngjitës duke i zënë frymën e më pas i kanë vënë në kokë një qese plastike dhe si pasojë e asfiksisë ajo ka gjetur vdekjen. Dy të dyshuyarit më pas i kanë vjedhur një shumë të hollash dhe disa sende të çmuara.
Po ashtu ka rezultuar se dy bashkëpunëtorët kanë hyrë në shtetin grek në mënyrë të paligjshme, pa respektuar formalitetet ligjore të kalimit kufitar nëpërmjet ndonjë pikë kufitare të atij shteti.
Ministria e Drejtësisë së Republikës së Shqipërisë ka pranuar kërkesën e Autoriteteve të Drejtësisë së Greqisë, mbi transferimin e procedimit penal në ngarkim të shtetasve shqiptarë Burim Duraku dhe Sh. D., të cilët dyshohen se kanë kryer veprat penale “Vrasja me dashje, në bashkëpunim”, “Vjedhja me dhune”, “Mbajtja pa leje e armëve të ftohta”dhe “Kalim i paligjshëm i kufirit shtetëror”.
/a.r
