Gjykata e Krimeve të Rënda ka dhënë sot vendimin duke e dënuar me 2 vjet burg avokatin Arjan Kalaja, pasi ai i ka vendosur “gjobë” anëtarit të Gjykatës së Lartë, Admir Thanza.
Ky i fundit i ka dërguaar një mesazh telefonik gjyqtarit Thanza që të paguajë në formë gjobë shumën prej 8 mijë dollarësh. Në të kundërtën, e ka kërcënuar se do i drejtohet mediave për të denoncuar aferat korruptive.
Ai është gjobitur me një mesazh në telefon, nga shtetasi Arjan Kalaja, i cili akuzohet për shtrëngim me anë të kanosjes për dhënie pasurie.
Çështja është mbajtur e fshehtë për shkak të statusit të personit ndaj të cilit është vendosur gjoba, një jurist i njohur prej 24 vitesh dhe që aktualisht është pjesë e kolegjit penal në Gjykatën e Lartë.
I pandehuri Kalaja ka dërguar në vitin 2013 një mesazh ne telefonin e gjyqtarit Thanza me tekstin “Më sill 8 mijë dollare ndryshe do të çoj tek Fiksi”.
Për tre vjet organet e hetimit kanë hetuar se kujt i përkiste numri i telefonit, i cili ishte blerë në tregun e zi e për pasojë ishte e vështirë të identifikohej. Procesi penal drejtohet nga gjyqtari i krimeve të rënda Fran Prendi, ndërkohë që i dyshuari po gjykohet në gjendje të lirë.
Vetë i akuzuari ka deklaruar se mesazhi i gjobëvënies ishte dërguar nga djali i tij, i cili ka ndërruar jetë nga një sëmundje. Gjyqtari Admir Thanza, më herët ka qënë gjyqtar në gjykatën e Tiranës, anëtar i KLD-së nga 2004 deri në 2009, anëtar i Gjykates Kushtetuese nga 2009 deri më 2013 e më pas anëtar i Gjykates së lartë. Panorama/a.
