Prindërit e të riut të vrarë, Klement Hoxhallari i kanë drejtuar një letër të hapur Presidentit të Republikës, Bujar Nishani, Kryeministrit Edi Rama si dhe ministrit të Drejtësisë, Ylli Manjanit, ndërsa kërkojnë drejtësi.
Nëna e 28-vjeçarit të vrarë rreth 1 viti e gjysmë më parë në Korçë, Adelina Hoxhallari ka kërkuar riekspertim, zbardhjen e tabulateve si dhe hetim për ngjarjen.
Nga ana tjetër, nëna e 28-vjeçarit akuzoi prokuroren Dorina Bejko për manipulim dhe fshehje provash, ndërsa në të njëjtën kohë kërkoi hetim për gjyqtarin Stavri Kallço, i cili sipas saj liroi vrasësin në këmbim të parave. “Gjyqtari është i korruptuar. Duam drejtësi!”, tha Adelina Hoxhallari.
AKUZAT
Ditën e djeshme, në emisionin “Me zemër të hapur” në News24, prindërit e 28-vjeçarit Klement Hoxhallari, i cili u vra me thikë në qershor të vitit të kaluar, pas një sherri për motive pronësie, kanë akuzuar organet e drejtësisë për manipulim të hetimeve.
Sipas nënës së të ndjerit, Adelina Hoxhallarit, Kallço, gjyqtari që gjykoi çështjen, vendosi masën e dënimit me 12 vite burg, me gjykim të shkurtuar për autorin e vrasjes së të birit, Elton Bregu, ndërsa Redi Kazerma që u dënua për “Moskallëzim krimi” u la i lirë. Familjarët nga ana tjetër, akuzuan dhe prokuroren Dorina Bejko, për manipulim të procesit hetimor./Balkanweb
