Nga Ardit Rada
Ilir Meta është betuar sot si Presidenti i VII-të i Republikës së Shqipërisë pluraliste nën formulën e betimit të paracaktuar. Zgjedhja e tij në krye të Shtetit ishte e pritshme nga mazhoranca e shkuar, për më tepër kur propozimi erdhi pikërisht nga Grupi Parlamentar Socialist. Edhe pse Meta u paraqit nga kreu i ekzekutivit si një emër që përfaqësonte më së miri edhe Partinë Demokratike, presidenti i ri kurrë nuk e pranoi këtë etiketim.
Në një jete politike 25-vjeçare ku Ilir Meta ka qenë deputet i Kuvendit të Shqipërisë pa ndërprerje, atij i janë dhënë të gjitha mundësitë për të provuar çdo hierarki të Shtetit Shqiptar. Një ish-deputet, një ish-kryeministër dhe ish-kryetar Kuvendi tashmë ulet në poltron për të zëvendësuar kështu Bujar Nishanin dhe për të vijuar historinë e Presidencës shqiptare.
Zgjedhja e Ilir Metës është komentuar gjatë si një djegie e karrierës së tij politike. Kjo tezë është tepër e diskutueshme kur mendon se askush nuk të bën president me forcë, apo kur ke parasysh moshën e Ilir Metës, që i lejon atij angazhimin politik edhe pas përfundimit të mandatit si President (…)
I lindur në vitin 1969, ai sot është një nga presidentët më të rinj që ka pasur ndonjëherë vendi. Kreut të ri të Shtetit, krahas ushtrimit të detyrës i lipset të ketë edhe një profil të tijin që do ta mbante më gjatë në politikë pas përfundimit të mandatit, apo do ta nxirrte në “pension politik” për t’iu përkushtuar familjes dhe kujtimeve.
Këto hamendësime janë tepër herët për t’u diskutuar, aq më tepër në ditën e parë të marrjes së detyrës. Por nga ana tjetër parashikojnë një presidencë tejet aktive të Ilir Metës, i cili krahas situatës politike do të përballet edhe me vijimin e reformave të pagëzuara nga Perëndimi.
Si një politikan karriere, Presidenti i ri ka shansin të tregojë se ndarja e dekoratave nuk është pjesë e përditshmërisë. Se kundërshtimi i ligjeve të mazhorancës së Ramës nuk do të nxitet për shkak të mosmarrëveshjeve të hershme me kryeministrin. Ilir Meta ka mundësinë që ta përdorë titullin që mban për t’i garantuar vërtetë një paanshmëri në gjykim akteve të Kuvendit, Qeverisë dhe kërkesave të opozitës.
I ndodhur para një vështirësie teknike, Presidenti i Republikës përbën një rast të paprecedentë dhe një risi për Shqipërinë. Teksa bashkëshortja e tij është numri dy i opozitës, atij i duhet të gjykojë mes Edi Ramës dhe bllokut opozitar që me gjasë mund të bashkohet.
Megjithatë, Ilir Meta i ka të gjitha shanset që të zgjedhë mes integrimit evropian dhe degradimit të skenës politike. Edhe pse themeluesi i LSI ka krijuar shumë hije dyshimi në skenën politike (kur ka treguar afrimitet me Nanon dhe Berishën në situata të nxehta) ai tashmë është para provës së madhe; Vendi ka oportunitetin që të bëhet anëtar i Bashkimit Evropian brenda këtij 4-vjeçari dhe të ecë para jo vetëm në reformën e Drejtësisë. Një sërë procesesh, si ai i Kodit Zgjedhor, lufta kundër krimit e të tjera pritet të jenë në agjendën e ekzekutivit shqiptar. Dhe këto kërkojnë një marrëdhënie ligjore mes Presidencës, Parlamentit dhe Qeverisë.
Ilir Meta ka në dorë që 21 të shtënat e topit që u dëgjuan mbrëmjen e sotme t’i përkthejë për Shqipërinë si një ndryshim të imazhit politik para botës në shekullin XXI. /JavaNews/
