Një makinë luksoze e blinduar u hodh në erë mëngjesin e djeshëm me eksploziv C4, por fatmirësisht pronari që ishte brenda në mjet nuk u lëndua. Ngjarja ndodhi rreth orës 07:10, në rrugën “Siri Kodra”, përballë ish-Frigoriferit, në Tiranë, kur i dëmtuari Artion Bylyku, 52 vjeç, sapo kishte hipur në makinën e tij tip “Mercedes Benz S Class”.
Artion Bylyku, 52-vjeçari që i shpëtoi dje mrekullisht atentatit me eksploziv në makinën e tij, kishte vetëm pak ditë që ishte kthyer nga Gjermania, ku jeton bashkë me familjen. Ai vinte herë pas here në Shqipëri, pasi kishte një biznes automjetesh dhe pjesësh këmbimi që i sillte nga jashtë. Së fundmi kishte sjellë në Tiranë 4 makina luksoze. Kjo veprimtari e tij është një nga pistat që po hetohet aktualisht nga grupi i oficerëve të Krimeve të Rënda që kanë marrë në dorë ngjarjen.
Por nga ana tjetër, një tjetër pistë jo pak e rëndësishme është edhe fakti se Artion Bylyku është kunati i Domart Konjarit, një personazh i njohur i botës së krimit pas viteve ’90 në Tiranë, por vitet e fundit edhe në Francë e vende të tjera të Europës. Vetë Bylyku, i cili i shpëtoi atentatit, që për grupin hetimor nuk ka asnjë dyshim se kishte për qëllim eliminimin e tij, nuk rezulton person me precedentë, apo që të ketë pasur më herët probleme me drejtësinë. Para më shumë se 25 vitesh, ai ka qenë i dyshuar për përfshirjen në një vrasje të ndodhur në Tiranë, që nuk u arrit t’i provohej asnjëherë dhe nuk u ndalua kurrë për të.
I pyetur nga oficerët e grupit hetimor, për ndonjë dyshim apo person konkret që mund të ketë dashur eliminimin e tij, Bylyku ka deklaruar se nuk ka probleme me askënd. Madje ka supozuar që ngjarja mund te jetë edhe ndonjë lajthitje në objektiv, duke qenë se makinën e kishte sjellë për ta shitur në Tiranë. Megjithëse një arsyetim i tillë nuk e ka bindur grupin hetimor, për faktin se në makinë ishte vendosur një sasi e madhe eksplozivi C4, por edhe duke qenë se makina ishte e blinduar. Një mjet i tillë, gjithmonë ka rezultuar të përdoret nga persona që i frikësohen një atentati të mundshëm, apo kanë probleme me persona të ndryshëm.
Burime nga Policia thanë dje se shpërthimi i fuqishëm ka ndodhur nga aktivizimi në distancë i një sasie të konsiderueshme eksplozivi C4, që ishte vendosur në pjesën e përparme të makinës. Por, gjatë këqyrjes së mjetit nga ekspertët kriminalistë, u zbulua edhe një tjetër sasi eksplozivi në pjesën e pasme, poshtë bagazhit, që fatmirësisht nuk ishte aktivizuar.
Shkelja e afateve, si e liroi Gjykata Domart Konjarin. Konjari u dyshua edhe për vrasjen e Devi Kasmit në vitin 2018
Një ditë pas ekzekutimit mafioz të Devi Kasmit, në janar të vitit 2018, Policia e Tiranës shpalli në kërkim policor një person që ishte në kërkuar. Bëhej fjalë për Domart Konjari, i cili që prej vitit 2016, kur u la i lirë nga Gjykata e Apelit për Krime të Rënda, edhe pse kërkohej nga Franca për trafik droge, nuk u arrit të gjendej asnjëherë nga Policia. E megjithëse në arrati dhe i konsideruar si një prej personave me rrezikshmëri të lartë, Konjari u kthye në qendër të vëmendjes, si i dyshuar për vrasjen e Kasmit, dikur mik i tij. Emri i Konjarit, si i person i dyshuar për atentatin te Pediatria, përmendej në një komunikatë të brendshme të Policisë së Shtetit, por pa u specifikuar nëse kishte rol ekzekutori apo porositësi të vrasjes.
Më pas, Policia tha se zbardhi vrasjen e Devi Kasmit dhe arrestoi disa persona, mes tyre edhe një shtetas grek, i cili aktualisht ndodhet në qeli, i dyshuar si ekzekutor. Megjithatë, për Konjarin nuk u tha më se çfarë roli kishte pasur në atë krim. Domart Konjari u arrestua fillimisht më 6 nëntor të vitit 2015, në Kapshticë, pasi për të kishte një urdhërarrest ndërkombëtar, lëshuar nga autoritetet franceze, si i përfshirë në një organizatë kriminale që trafikonte drogë.
Masa e sigurisë ndaj tij u dha fillimisht nga Gjykata e Korçës, e cila e la në burg, por më pas shpalli moskompetencë, duke e transferuar çështjen te Gjykata e Krimeve të Rënda. Konjari qëndroi në burg deri më 14 mars të vitit 2016, kur Gjykata e Apelit për Krimet e Rënda vendosi masën e sigurisë “detyrim paraqitjeje” ndaj tij. Kjo u bë nën argumentimin ligjor se masat e sigurisë, të vendosura nga gjykatat që kanë shpallur moskompetencë, i humbasin efektet pas 10 ditëve.
Dhe për Konjarin nuk u dha asnjë masë nga Krimet e Rënda, duke bërë që të shkelen afatet ligjore. Shkelja e tyre çoi edhe në lirimin e Konjarit. Menjëherë pas lirimit, në mars 2016, Prokuroria bëri rekurs në Gjykatën e Lartë, e cila në maj e rrëzoi kërkesën, pa e marrë nën shqyrtim çështjen.
Këto veprime i dhanë kohë Konjarit që të humbte gjurmët dhe prej asaj kohe, ai është në arrati. Lirimi nga qelia i Konjarit u përcoll me bujë deri në kufijtë e një skandali në Gjyqësor dhe shkaktoi një përballje mes Prokurorisë dhe Gjykatës së Apelit për Krimet e Rënda.
Përmes një letre drejtuar krerëve të shtetit, ambasadori francez në Tiranë shprehu shqetësim mbi lirimin e Konjarit. Përveç kësaj, gjyqtarët u dërguan për procedim disiplinor nga Ministria e Drejtësisë, por Këshilli i Lartë i Drejtësisë nuk mori asnjë masë.
g.kosovari
