Hilë Gjini ka rrëfyer se si u plagos dy ditë më parë në këmbë nga fqinji i tij, ngjarje e ndodhur në Balldre të Lezhës. 43-vjeçari tregon se ai ka qenë në makinë kur i ka dalë përpara autori i ngjarjes, Gjergj Gjini, 69 vjeç.
Hila ka qenë në makinë së bashku me 4 fëmijët e tij, kur i ka dalë para fqinji me pistoletë në dorë, të cilën e lëvizte sa majtas dhe djathtas. 43-vjeçari ka dalë nga makina dhe teksa ka tentuar që t’i marrë pistoletën ai e ka goditur dhe e ka plagosur në këmbë.
Nga spitali i Lezhës Hilë Gjini, në një intervistë për emisionin “Shqipëria Live”, ka treguar versionin e tij të ngjarjes. I pyetur se a ka patur probleme prone me të akuzuarin, ai u shpreh se nuk ka pasur asnjëherë probleme me të. Ndërkohë shton se Gjergji ka patur konflikte të tjera, por vetë ai nuk ka pasur asnjëherë probleme me të.
“Isha në makinë me 4 fëmijët. Doli para Gjergji, i cili po luante armën sa majtas dhe djathtas për të gjuajtur drejt makinës. Aty vendosa që të dilja jashtë. Një plumb më kapi në këmbë, pasi ia ula armën”.
Hila shton se më pas kanë dalë fëmijët dhe gruaja e tij, të cilët janë përleshur me 69-vjeçarin për t’i marrë armën.
“Unë isha në tokë se arma bën punën e vet. Por nusja me fëmijët arritën t’ia merrnin. Ka gjuajtur një plumb, kur po përlesheshin fëmijët më të, por fatmirësisht nuk i kapi. Kur i pashë fëmijët të përlesheshin me të, unë isha në tokë e nuk mund të bëja asgjë. Nuk i kisha humbur ndjenjat, por nuk isha i zoti për të lëvizur. Pasi i morëm armën, gruaja ia dha vajzës dhe ajo u largua. Nisi të gjuante me gurë dhe më pas u largua. Fatmirësisht ata janë mirë”, përfundoi Hilë Gjini.
/a.r
