Është ndërprerë në mes në mënyrë tragjike jeta e 22-vjeçares shqiptare Ilaria Sula, e cila u vra nga ish-i dashuri i saj.
Ngjarja e ndodhur në Itali ka shokuar mbarë opinionin, ndërsa mediat vendase kanë zbuluar detaje për tragjedinë. Trupi i pajetë i saj është gjetur ditën e sotme në një zonë të pyllëzuar në fund të një përroi pranë komunës së Polit, brenda një valixheje të madhe, ndërsa ishte shpallur e zhdukur prej prindërve disa ditë më parë.
Ish-i dashuri 23-vjeçar ka pranuar krimin dhe tashmë është vënë në prangat e policisë. 23-vjeçari me origjinë filipinase ka deklaruar se e ka vrarë studenten shqiptare duke e goditur me thikë në një apartament në Romë, dhe më pas ka futur trupin e saj në një valixhe, për të fshehur krimin.
Dyshohet se arsyeja e vrasjes ka qenë mosdakordësia e tij për t’i dhënë fund lidhjes.
Në ditët e zhdukjes së saj, 23-vjeçari dyshohet se përdori celularin e të resë për të postuar në profilin e rrjeteve sociale të Ilaria-s, duke shpërqendruar hetimet.
