‘I like Hashim’, është shprehja me të cilën Aleksandër Vuçiç iu drejtua dy herë Hashim Thaçit gjatë një konference në Forumin e Alpbach të Austrisë që u mbajt ditë më parë me ndërmjetësimin e ish-presidentit të Austrisë, Alexander Van der Bellen, e ku u diskutua rreth një marrëveshjeje të mundshme ndërmjet Kosovës dhe Serbisë. Ndërsa sot, Thaçi ka treguar një anë tjetër të raporteve të tij me Vuçiçin.
Ai ka thënë se nuk i pëlqen fare Aleksandër Vuçiç, edhe pse ai është njeriu që pothuajse takohet më së shumti si president.
“Aspak nuk janë të lehta këto takime. Janë më të rënda seç mendoni ju. Janë raporte shumë të vështira, dhe unë nuk e pëlqej fare Vuciçin, por është i zgjedhur i popullit serb”, ka thënë Thaçi gjatë një konference të organizuar nga KDI, raporton Express.
“As ai nuk e besoj fort që ka ndonjë pëlqim ose respekt në raport me presidentin e Kosovës. Mirëpo jemi të zgjedhurit e dy vendeve dhe duhet të ulemi të bisedojmë”, ka vazhduar tutje Thaçi.
Ndërkohë Thaçi ka drejtuar kritika të ashpra ndaj atyre që kanë thënë se ideja e tij për prekje të kufijve të Kosovës nënkupton luftë.
“Nëse unë flas për paqe dhe ai flet për paqe, çfarë ka të keqe këtu. Duhet të frikësoheni nëse dikush në Prishtinë flet për luftë dhe nëse dikush në Beograd flet për luftë. A do t’i gjej homologun e Sheshelit në Prishtinë?”, është shprehur Thaçi.
Kujtojmë se me 7 shtator do të jetë takimi i radhës në Bruksel ndërmjet dy presidentëve, ku do të diskutohet arritja e një marrëveshje të mundshme ndërmjet dy vendeve përmes idesë së korrigjimit të kufijve.
Një gjë e tillë u kundërshtua nga i gjithë faktori politik në vend, dhe opozita pritet që të nxjerrë një rezolutë që ia ndalon Thaçit të flas për çështje të territorit të Kosovës.
a.ç
