Xhafo Shenaj, i cili u bë dje personazh dhe objekt sulmesh, pasi i kërkoi publikisht kryeministrit Edi Rama që të takohej me Lulzim Bashën, ka reaguar lidhur me akuzat e bëra nga lideri i PD-së.
Në një prononcim për ‘News24’, ‘demokrati’ Shenaj nga Cakrani i Fierit pohoi se akuzat që rënduan dje ndaj tij se djali merrej me kultivim narkotikësh, duke i cilësuar ato të pavërteta.
“Akuzat ndaj meje janë të pavenda. Basha është informuar me gjëra të pavërteta. Kjo është bërë për të dëmtuar imazhit tim e të familjes”, tha Shenaj.
Fill pas thirrjes dje të Shenajt që Basha të dilte nga protesta dhe të ulej në tryezë me Ramën, kreu i PD-së publikoi një mesazh nga një qytetar dixhital, i cili e identifikonte banorin si një babain e trafikantit të hashashi dhe zaptues pronash. “Njësoj si Ramizi me Vullnetarët e Enverit në ditët e fundit të regjimit edhe Rama me Vullnetaret e Hashashit në ditët e fundit të Republikës se Vjetër:
“Për dijeni tënden Kryetar ai qytetari që bisedonte në Cakran me Ramën dhe që bënte humor kinez quhet Xhafo Shenaj dhe ka zaptuar tokën e pronarëve të ligjshëm. Djali i këtij fshatarit Xhafo Shenaj që bisedoi sot me Ramën në Cakran është trafikanti dhe kultivuesi më i madh i hashashit në Cakran. Që nuk bën asnjë punë dhe shëtit me makinë mbi 50 mijë euro. Prandaj dhe ky i bënte elozhe Ramës dhe ironi Bashës sepse vetë Rama e di që ky Xhafo Shenaj ka parcela të mbjella në bashkëpronësi me Armando Subashin.”, thuhej në mesazhin që publikoi Basha.
Kryeministri Edi Rama ka reaguar në lidhje me akuzat që sot bëri rivali i tij, Lulzim Basha, sa takon deklaratave të një banori në Cakran të Fierit, ku ky i fundit ftoi dy liderët për dialog.
Ndërkohë, pak orë më vonë erdhi dhe përgjigja e kryeministrit Edi Rama, i cili i doli në mbrotje ‘demokratit’. Me anë të një statusi në faqen e tij në ‘Facebook’ Rama i kërkonte ndjesë zotërisë për fjalorin anormal të kreut të PD.
“Sot isha në Cakran të Fierit, ku ndër të tjerë pata edhe një dialog me zotërinë në videon bashkëngjitur. Jam sinqerisht shumë i keqardhur për të, sepse për shkak të këtij momenti njerëzisht miqësor komunikimi që mund ta shihni vetë, u sulmua egërsisht (madje familjarisht) nga Lulëzim Basha si kriminel e si trafikant i shitur tek krimi! I kërkoj shumë ndjesë zotërisë për fjalorin anormal të kryetarit të PD-së dhe i lutem atij e familjes së tij të mos e marrin seriozisht Lulëzim Bashën që mesa duket e ka humbur fare busullën.”, thuhej në mesazhin e Ramës. / b.d
