Moti i ftohtë që ka përshirë të gjithë vendin tonë këto ditë, duket se do të vazhdojë edhe javën që vjen.
Meteorologia Lajda Porja në një prononcim për mediat tha se sipas parashikimeve, sot sikundër dita e djeshme janë ditët më të fohta, ku deri tani janë shënuar temperaturat më të ulëta në stinën e dimrit.
“Nuk parashikohet të ketë reshje deri në datën 12 janar, por temperaturat megjithëse rriten të hënë e të martën, kemi të bëjmë me një rritje të lehtë jo të ndjeshme, sidomos për zonat problematike, ku temperaturat shkojnë -19 gradë”, deklaroi Porja.
Sipas saj, megjithëse temperaturat do të rriten me 1-2 gradë ngricat vazhdojnë të jenë prezente. Rritja më e ndjeshme, informoi Porja, do të fillojë nga dita e mërkurë e deri në fund të javës ku pritet të ketë rritje me 3-4 gradë nga dita në ditë, duke bërë që fundjava, e shtunë dhe e djelë, të jetë më e paqëndrueshme dhe do të ketë edhe ndryshim të masave ajrore.
“Aktualisht kemi të ftohtin polar që ka mbërthyrr pjesën më të madhe të kontinentit dhe gjithë gadishullin e Ballkanit”, shprehet Porja.
Në fakt, theksoi ajo, këto zona të cilat janë problematike pritet nga fundjava që vjen të shkojnë në vlerat e tyre tipike. Aktualisht , vijoi Porja, temperaturat janë ekstremisht të ulëta, – 19 gradë të shënuara në qytete. Ndërkohë, sipas saj, në qafë malesh apo zona të tjera temperatura është edhe më e ulët se sa kaq.
“Deri të premten dituata do të mbetet e tillë. Parashikohet që temperaturat në fundin e javës që vjen të shkojnë në vlerat -9 deri -4 gradë “, deklaroi Porja.
Ngricat, shprehet ajo, do të jenë prezente dhe më problematike paraqitet verilindja e vendit, aty ku janë edhe temperaturat më të ulëta të shënuara për këtë episod. Sipas parashikimeve të meteorologëve, ngricat mbeten prezent deri në mesin e janarit, ndërsa fundjava tjetër do të sjellë reshje të pakta dëbore në zonat verilindore.
