Për një dekadë, Donald Trump dhe Jeffrey Epstein ishin miq të ngushtë, të paktën sipas vetë financierit pedofil, i cili u vetëvra (ose u vra) në burg në 2019-ën. Këtë marrëdhënie, Presidenti amerikan nuk ka mundur ta mohojë, pasi ajo është e dokumentuar në fotografi, dëshmi dhe intervista të shumta.
Pas prishjes së marrëdhënies në vitin 2004, rrugët e tyre morën kahe të ndryshme: për Epstein, akuzat për pedofili, burgu dhe vdekja e dyshimtë ndërsa për Trump, pushteti, fama dhe Shtëpia e Bardhë, pavarësisht proceseve gjyqësore dhe skandaleve.
“Ishulli i mëkateve“
Epstein kishte kthyer ishullin e tij privat, Little St. James, në një fole abuzimesh me të mitura. Edhe pse Trump mohon se ka qenë ndonjëherë në ishull (dhe nuk ka prova që ta kundërshtojnë këtë), lidhjet e tij me Epstein janë të dokumentuara që në vitet ‘90.
Për më tepër, ai është përmendur si një nga pasagjerët e shumtë të “Lolita Express”, avioni privat i Epstein, ku, sipas vetë Epstein, Trump ka njohur bashkëshorten e tij, Melanie.
Një miqësi që po e fundos…
Për herë të parë që kur ka hyrë në politikë, Trump nuk po arrin të kontrollojë narrativën. Mbështetësit e tij më besnikë, të MAGA-s, ndihen tani të tradhtuar. Për ta, dokumentet dhe fotot e vjetra janë prova që edhe vetë drejtuesi i tyre mund të ketë diçka për të fshehur.
Një shkëndijë tjetër përplasjesh ishte një letër urimi që Trump dyshohet se i ka dërguar Epstein-it për ditëlindjen e 50-të, letër që ai mohon ta ketë shkruar. Megjithatë, dëshmitë, videot dhe vetë deklaratat e Trump në intervista të mëparshme janë të shumta: si ajo për “New York Magazine” në vitin 2002, ku e përshkruante Epstein si “një tip i jashtëzakonshëm që i do femrat e bukura, si unë, veçanërisht ato shumë të reja.”
E shkuara që nuk fshihet
Në një intervistë të gjatë me gazetarin Michael Wolff në vitin 2017, Epstein e përshkruan Trump-in si një njeri të pamëshirshëm, pa miq dhe me sjellje të shfrenuara. Ai rrëfen për strategjitë që Trump përdorte për të joshur gratë e miqve të tij, përmes komploteve seksuale në kazino e rezidenca private.
Një prej episodeve më tronditëse është i vitit 1992, ku thuhet se një organizator eventesh solli 28 vajza në Mar-a-Lago për një konkurs bukurie. Në vend që të kishte një juri dhe publik, zbuloi se të vetmit të pranishëm ishin Trump dhe Epstein. Një natë që sipas përshkrimeve ishte “e zjarrtë”, dhe që është pjesërisht filmuar nga televizioni NBC.
