Elseid Hysaj është cilësuar si protagonist negativ i ndeshjes mes Napolit dhe Palermos, të përfunduar në mënyrë të paparashikuar në barazimin 1:1.
Mbrojtësi shqiptar u kritikua sidomos për rolin e tij në momentin e golit të shënuar nga Nestorovski në minutën e 6 të ndeshjes, kur nuk mbuloi siç duhet futbollistin kundërshtar.
Edhe pse në pjesën e dytë ai arriti të tregonte të gjitha vlerat e tij duke ndihmuar skuadrën jo vetëm në mbrojtje, por edhe në sulm, sot në mediat më të mëdha sportive italiane i jepej rëndësi më shumë atij momenti që rezultoi vendimtar për ndeshjen, shkruan Panorama Sport.
Për të mbrojtur futbollistin shqiptar mendoi menaxheri i tij, Mario Giufredi, i cili në një prononcim për “Radio CRC”, e cilësoi këtë si një episod rastësor.
“Ishte një mungesë momentale përqendrimi, asgjë më shumë, mos e bëni dramë. Ishte një gabim kolektiv në mbrojtje dhe jo individual. Janë gabime në vendosjen e repartit që mund të ndodhin”, tha ai duke shfajësuar Hysajn për këtë episod.
Ndërkaq, ai ka konfirmuar se mbrojtësi i krahut të djathtë ndiqet me interes nga skuadra të mëdha në Evropë.
“Sigurisht që ekzistojnë vlerësime për të. Monitorohet nga skuadrat më të mëdha në Evropë. Por tani nuk mendojmë për gjëra të tilla dhe mendojmë për Napolin. Do të shohim në verë se si do të veprojmë”, deklaroi Giufredi. /a.m.
