Transferimi i Neymarit te Paris Saint Germaini, me francezët që paguan 222 milionë euro për ta marrë nga Barcelona, shënoi një moment kthese në futbollin botëror.Një investim që tronditi konceptin për klauzolat e prishjes së kontratës pasi deri në verën e kaluar mendohej se disa shifra ishin të pamundura për tu paguar dhe më tepër kishin një vlerë simbolike.
Këtë e konfirmuan rinovimet e yjeve te Barcelona. Sipas kontratës së re, për Lionel Messin klubet e interesuara duhet të paguajnë 700 milionë euro. E megjithatë sulmuesi argjentinas renditet i treti, pasi klasifikimi special kryesohet nga dy sulmuesit e Realit të Madridit, Cristiano Ronaldo dhe Karim Benzema, klauzola për prishjen e kontratës së të cilëve është në kuotën një miliard euro. Me 700 milionë euro, Messi barazoi dy lojtarë të tjerë të “Los Blancos”, Isco dhe Marco Asensio.
Klauzolë e çmendur ishte edhe ajo që Barcelona vendosi në rinovimin e kontratës me Gerard Pique. 500 milionë euro, shifër me të cilën mbrojtësi katalan pozicionohet në vendin e gjashtë, ku barazoi Gareth Bale e Luka Modrid në renditjen e klauzolave më të shtrenjta në botë. Bie në sy fakti se për të blerë emra si Iniesta, Luis Suarez, Busquets, Casemiro dhe Sergio Ramos nevojiten 200 milionë euro, transmeton Supersport.
18 vendet e para të renditjes speciale dominohen nga Reali dhe Barcelona, duke konfirmuar se me shifrat astronimike Spanja dominon skenën europiane. Klauzolat për prishjen e kontratave kanë hyrë në modë edhe në Serinë A, aty ku mes lojtarëve më të shtrenjtë figuron edhe Elseid Hysaj.
Ylli i Napolit dhe Kombëtares shqiptare është lojtari i gjashtë më i shtrenjtë i futbollit italian, me klauzolën 50 milionë euro, aq sa edhe Brozović i Interit. Lojtari më i shtrenjtë i Serisë A është kapiteni zikaltër Mauro Icardi me 110 milionë euro, i ndjekur nga Belotti i Torinos me 100 milionë. (b.an)
