Zbardhet rrahja barbare e Elvis Elezit! Pesë ditë pas pamjeve që bënë xhiron e të gjitha mediave, Policia e Shtetit ka shpallur në kërkim një 34-vjeçar të identifikuar si Gazmend Kusta, i cili akuzohet se ka qenë organizatori dhe ‘prijësi’ i katër personave që dhunuan Elezin në një lokal në Fushë Krujë.
34-vjeçari rezulton të jetë një person me precedentë penalë dhe i dënuar më herët jashtë Shqipërisë për veprën penale “Trafikimi i lëndëve narkotike”, por identiteti i tij nuk dihet ende. Ndërsa një 31-vjeçar, i identifikuar si Geart Bakalli, është vënë në pranga pasi akuzohet se ka bashkëpunuar me autorët e ngjarjes.
Konkretisht në shtëpinë e Bakallit janë gjetur dhe sekuestruar disa veshje të përdorura nga autorët dhe 1 mjet tip “Audi”, të cilin dyshohet se autorët e kanë përdor për t’u larguar. 31-vjeçari akuzohet për veprën penale “Veprime që pengojnë zbulimin e së vërtetës”.
Elezi u rrah teksa qëndronte në një lokal në lagjen Bakushe Visha në Krujë. Katër persona të maskuar dhe të armatosur u futën në lokal dhe dhunuan barbarisht Elezin. Vetë i dhunuari është një person me precedentë penalë. Ai ka qenë dënuar më herët në Kroaci për trafik të lëndëve narkotike, e ka vujatur dënimin dhe është kthyer në Shqipëri, por telashet nuk i janë ndarë. Elezit mësohet se i është bërë edhe një tjetër kërcënim më herët. Para një viti, i kanë vendosur një eksploziv në banesë, ngjarje që ka përfunduar me dëme materiale.
“Specialistët për Hetimin e Krimeve në Komisariatin e Policisë Krujë, në vijim të punës për zbardhjen e ngjarjeve të ndodhura më parë, identifikimin, kapjen e autorëve dhe vënien e tyre para përgjegjësisë penale, bënë shpalljen në kërkim të shtetasit G. K., 34 vjeç, banues në Budull, Krujë, i dënuar më parë jashtë vendit, për veprën penale “Trafikimi i lëndëve narkotike”. Ky shtetas dyshohet se më datë 17.02.2021, ka hyrë me disa persona të tjera në ambientin e një lokali në Fushë Krujë dhe ka goditur me sende të forta, duke i shkaktuar lëndime në kokë, shtetasit E. E., 30, vjeç, i cili pasi ka marrë ndihmën mjekësore është larguar në banesë.
Në vijim të hetimeve është bërë ndalimi i shtetasit G. B., 31 vjeç, për veprën penale “Veprime që pengojnë zbulimin e së vërtetës”, pasi gjatë kontrollit të ushtruar në banesën e tij nga shërbimet e Policisë u gjetën dhe u sekuestruan në cilësinë e provës materiale, disa veshje të përdorura nga autorët dhe 1 mjet tip “Audi”, të cilin dyshohet se autorët e kanë përdor për t’u larguar”, thotë policie.
Nën drejtimin e Prokurorisë së Rrethit Gjyqësor Krujë vijon puna për identifikimin dhe kapjen e personave të tjerë të implikuar në këtë ngjarje.
Materialet i kaluan Prokurorisë së Rrethit Gjyqësor Krujë, për veprime të mëtejshme.
g.kosovari
