Një mjeshtër shahu ka ndërruar jetë papritur në moshën 29-vjeçare.
Daniel Naroditsky ishte një prej figurave më të njohura amerikane në shah dhe një ish kampion bote për të rinjtë.
Në moshën 14-vjeçare, ai shkroi e botoi një libër dedikuar lojës dhe vite më vonë, i mësonte ndjekësit përmes transmetimeve në Twitch dhe Youtube.
Naroditsky ishte trajneri kryesor në Charlotte Chess Centre në Karolinën e Veriut. Në një deklaratë ku njoftonte ndarjen e tij nga jeta, institucioni shkroi:
“Daniel ishte një lojtar i talentuar shahu, komentator dhe mësues, një anëtar i vlerësuar i komunitetit të shahut, i admiruar dhe i respektuar nga fansa e lojtarë në të gjithë botën. Ai ishte edhe një djalë e vëlla i dashur, një mik besnik…Le ta kujtojmë Daniel për dashurinë dhe pasionin e tij për lojën e shahut, për gëzimin dhe frymëzimin që na sillte çdo ditë.”
Shkaku i vdekjes së tij nuk është bërë publik.
Naroditsky renditej vazhdimisht në listën e 200 lojtarëve më të mirë në botë për shahun tradicional dhe shkëlqente në stilin e shahut të shpejtë.
