Dibra i ka zgjidhur me votën e saj të qartë të gjitha nyjet dhe pikëpyetjet që rëndonin mbi një fushatë zgjedhore që parashihej plot të panjohura dhe dilema. Me mbi 4000 vota distancë nga rivali i tij i djathtë, mjeku Muharrem Rama, kreu i ri i bashkisë, ka mundur të shuajë ende pa nisur, çdo sherr elektoral që është aq i shpeshtë në të gjitha proceset tona zgjedhore, prej një çerek shekulli.
Konsumi më shumë se trevjeçar i qeverisë, skandali Shukriu dhe të qenit një zonë e djathtë historike, nuk kanë mjaftuar që opozita të dalë nga Dibra me një mandat bashkie më shumë. Do të mbetet sërish raporti i zgjedhjeve të fundit vendore, e kjo në vetvete përbën një humbje “shumështresore” për PD dhe kryetarin e saj Lulzim Basha.
U duk qartë se opozita u fokusua tek Dibra, si tek një betejë të cilën duhej ta fitonte me patjetër. Më zgjuar luajtën socialistët, të cilat atashuan aty njërin prej ministrave, duke u kujdesur që maxhoranca të mos bënte shou fytyrash të njohura. Ndoshta edhe për shkak se disa prej figurave të shumicës mund të sjellin vërtet efekt të kundërt në një zonë delikate si ajo e Dibrës.
Në fund të një rruge e cila dukej në ngjitje për socialistët dhe e lehtë për demokratët, këta të fundit marrin një shuplakë djegëse, e cila ishte sinjali më i padëshëruar për opozitën shqiptare, vetëm dhjetë muaj para zgjedhjeve të përgjithshme. Një vit më parë, kur u votua pushteti vendor, u tha gjerësisht se testi elektoral nuk vlente për Bashën dhe ekipin e tij, për arsye se ai ishte një staf ende në kolaudim e sipër. Sot kjo është e vështirë të thuhet. Lulzim Basha është në timonin e partisë së tij prej më shumë se tre vjetësh dhe po i drejtohet zgjedhjeve të përgjithshme jo vetëm pa një ofertë të konsoliduar politike, por edhe me një lidership personal që sot ngjan më i dobët dhe anemik se kurrë. Zgjedhjet e Dibrës nuk kanë ndonjë peshë në skakierën kombëtare të votave, por produkti i tyre, momenti në të cilën u mbajtën dhe mënyra me të cilën ato u mbyllën, shënojnë një dështim djegës për kreun e opozitës. Lidershipi i tij është, pas këtyre zgjedhjeve, më se kurrë në pikëpyetje. Sot u festua Kurban-Bajrami, por ndodhi gjithashtu, nëse mund të përdoret një metaforë e ngjashme, edhe Kurban-Lulëzimi!
Javanews.al
