Një aksident fatal ka ndodhur në Itali, me pasojë vdekjen e një emigranti shqiptar në autostradën mes Lucca dhe Viareggio.
Bruno Hasanaj, 50 vjeç, me banim në Lucca, humbi jetën në aksident teksa udhëtonte me një makinë tip “Smart”, bashkë me një grua me emrin Ilaria Capocchi.
Nga hetimet e policisë, Hasanaj, dyshohet të ketë humbur kontrollin e mjetit në rrethana ende të paqarta, rreth orës 01.00 pas mesnatës mes të shtunës dhe të dielës duke u aksidentuar, ndërkohë që drejt tij vinte një furgon me shpejtësi të madhe, i cili nuk arriti të frenojë në kohë.
50- vjeçari shqiptar u nxor i vdekur nga makina, i bllokuar mes llamarinave, ndërsa gruaja që ndodhej në makinë me të, pësoi vetëm dëmtime të lehta.
Ndërkohë shoferi i furgonit të përfshirë në aksident nuk pësoi dëmtime dhe rezultoi negativ ndaj testit të alkoolit apo drogës./a.k
