Huliganët e Beogradit në Tiranë, SHISH kërkon ndihmë nga shërbimet sekrete serbe
Ekskluzive /Ultrasit serbë duket se kanë mbërritur në Tiranë për ndeshjen Shqipëri-Serbi që do të luhet më 8 tetor në stadiumin “Elbasan Arena”. Në tabelat sinjalizuese të rrugëve të Tiranës janë ngjitur banera të vegjël të grupimit ultras të Partizanit të Beogradit, “Ultras Grobari Partizani Beograd”. Këta të fundit ishin të pranishëm edhe në ndeshjen e 14 tetorit të vitit të kaluar në Beograd ku hynë edhe në fushë duke dhunuar lojtarët e kombëtares tonë. Fotoja me shenjat është publikuar nga profili i “Jeta osh qejf” në rrjetin social Facebook.
Por Shërbimi Informativ Shtetëtor duket se i ka marrë të gjitha masat që të mbajë larg stadiumit të Elbasanit ultrasit serbë. Burime pranë këtij institucioni thonë për Javanews se SHISH ka kërkuar nga shërbimet sekrete serbe emrat dhe të dhënat e çdo ultrasi problematik në Serbi, të cilët edhe janë proceduar më parë nga autoritetet serbe.
Në këtë mënyrë, SHISH do të ketë të dhënat e huliganëve serbë, që do ua dërgojnë edhe organeve të tjera të sigurisë shqiptare, që të jenë të kujdesshëm në pikat kufitare për të mos lejuar që personat e skeduar të hyjnë në territorin shqiptar.
Nga ana tjetër edhe FSHF ka frikë se midis tifozëve që do të jenë të pranishëm në “Elbasan Arena”, mund të ketë persona të infiltruar me kombësi jo shqiptare. Për këtë arsye, SHISH i ka kërkuar Federatës një listë me emrat e të gjithë 12.700 tifozëve që do të pajisen me biletë për të ndjekur ndeshjen në stadium. Në këtë mënyrë SHISH duke pasur edhe listën e homologëve serbë do të verifikojë emrat e dyshimtë për ti ndaluar jo vetëm që të hyjnë në stadium, por edhe të ndalohen që në kufi.
Kush janë ultrasit serbë
“Ultras Grobari Partizani Beograd” janë ndër më problematikët jo vetëm në Ballkan, por edhe në Europë. Por edhe ultrasit e “Crevena Zvezdës nmë Beograd janë njësoj si rivalët e tyre. Ultrasit e Crevena Zvezdës së Beogradit, “Delije” (Heronjtë), formojnë bazën e “Tigrave” të Arkanit, një grupimi serb paraushtarak, i cili është implikuar në shumë akte terrori gjatë Luftës në Jugosllavi.
