Nisur nga një artikull që trajtonte temën e tradhtisë në të ’60-at, “Shije Shtëpie” në Tv Klan kërkoi këndvështrimin e tre personave të ndryshëm, hoxhës Hajredin Dizdari, Petri Bozos dhe Dr. Shkëlqim Balilit. Ky i fundit, më herët gjatë programit, sqaroi nga ana biologjike se mashkulli është aktiv seksualisht deri në moshën 80-vjeçare dhe shpesh, arsyeja pse tradhton janë marrëdhëniet seksuale me një person më të ri në moshë se sa bashkëshortja.
Në aspektin fetar, hoxhë Hajredin Dizdari tha se tradhtia nuk tolerohet, por shkelja e kurorës është e kategorizuar. Sa më i madh në moshë të jetë personi, aq më e rëndë është tradhtia.
Hoxhë Hajredin Dizdari: Unë nuk mendoj që tradhtia është e justifikueshme aq më tepër kur ajo ndodh në një moshë kaq të madhe. Për sa i përket anës fetare, asnjëherë njerëzit imoralë nuk kanë qenë njerëz të cilët janë justifikuar për imoralitetin e tyre përpara Zotit. Zoti gjithmonë e ka ndëshkuar imoralitetin e njeriut. Për sa i përket moshës, para Zotit, aq më keq kur tradhtia ndodh në një moshë aq të madhe për shkak se profeti Muhamed kur përmend njerëzit që tradhtojnë, i kategorizon. Është ndryshe të jetë imoral një person i cili është i pamartuar, është ndryshe të tradhtojë kurorën një person i cili është i martuar dhe aq më keq të tradhtojë kurorën një person i cili është i martuar dhe në moshë të madhe, madje në një shkrim profetik, profeti tha që mëshira e Zotit nuk e mëshiron ditën e gjykimit Zoti atë njeri i cili në moshë të madhe, në moshë të thyer, ka kryer imoralitet.
Agida Koçi: Po çfarë ndryshimi përbën mosha nëse tradhtia është po i njëjti fenomen?
Hoxhë Hajredin Dizdari: Po në moshë të madhe, është e dijshme besoj që njeriu nuk e ka fuqinë dhe tërheqjen siç e ka në rininë e tij, për këtë arsye është bërë një klasifikim në fe dhe Zoti e ka bërë këtë klasifikim dhe e ka njohur që i riu është ai i cili është më i prirur të ketë marrëdhënie të tilla sesa një person që është i thyer në moshë dhe besoj që doktori e sqaron këtë gjë edhe më mirë.
