Në mjediset e Muzeut Historik Kombetar, u mbajtën stë mërkurën pasdite homazhe në nderim të viktimave të atentateve terroriste në Bruksel.
Homazhet u organizuan nga I ngarkuari me punë i vendeve të Beneluksit në Tiranë, Jurgen Van Meirvenne dhe ambasadori i Francës në Tiranë, Berndard Fitoussi
Të pranishëm në homazhe ishin zv/ Ministri i Punëve të Jashtme, Selim Belortaja, Zv/ministrja e Punëve të Brendshme Elona Gjebrea, si dhe ambasadorët e vendeve të Bashkimit Europian të akredituar në Shqipëri, përfaqësues nga Delegacioni i Bashkimit Evropian në Tiranë, nga OSBE, si dhe deputetë dhe qytetarë.
Të pranishmit e shumtë të mbledhur në mjediset e MHK vendosën lule, ndezën qirinj e mbajtën 1 minutë heshtje në nder të viktimave.
Homazheve në nderim të viktimave të atentateve terroriste në Bruksel, i është bashkuar edhe Kryeministria, e cila ka ulur në gjysëm-shtizë flamurin e Shqipërisë dhe Belgjikës si dhe ka ndriçuar murin ballor me ngjyrat e flamurit belg si simbol të nderimit të viktimave të sulmeve terroriste në Bruksel.
Sulmet e së martës në Aeroportin dhe Metronë në Bruksel shënuan 31 persona të vdekur dhe 270 të plagosur, sipas një bilanci të fundit zyrtar të publikuar nga Prokuroria Federale belge.
