Evander Holyfield ka qenë në premirën e një filmi të ri që flet për sfidat e tij me Mike Tyson, të titulluar “Chasing Tyson”, dokumentar që flet për rivalitetin në sportin e boksit dhe në veçanti për rivalitetin mes tij dhe “Iron Man”. Natyrisht që vëmendja e këtij rivaliteti bazohet në sfidën e vitit 1997, ndaj dhe në këtë film i është bërë një analizë atij dueli. Tyson kafshoi në vesh Holyfield në atë duel, duke e humbur ndeshjen dhe pezulluar.
Sfida e vitit 1997 ishte e dyta mes tyre, një duel revanshi për Tyson, që kishte humbur me “KO” teknik edhe përballjen e një viti më parë (1996). Të dyja këto duele janë zhvilluar në Las Vegas. Në këtë premieri filmi analizohet edhe se si Holyfield arrin ta mposhtë dy herë Mike Tyson brenda një viti në ring, veçanërisht në duelin e dytë, që ishte edhe më i diskutuari për gjestin e Mike.
Ai duel i vitit 1997 u ndërpre në raundin e tretë, në momentin që Tyson kafshoi veshin e Holyfield. Ai pranon se pas duelit e ka falur shumë kollaj rivalin e tij, duke shpjeguar arsyen. “Boksin e konsideroj si një sport ku duhet të vendosësh në momentin e fundit dhe të duhur për të goditur. Kur kam qenë fëmijë, unë gjithnjë e kam kam kafshuar vëllanë tim kur ziheshim, një gjest që e bëja për të fituar. Ndaj dhe unë e fala Tyson, pasi më kujtoi fëmijërinë time”, ka thënë Holyfield gjatë një konference shtypi.
Në këtë dokumentar, të realizuar nga Steven Cantor, boksieri Evander Holyfield është përshkruar si njeriu i mirë që u përball me “njeriun më të keq në planet”, Mike Tyson. Holyfield nuk konsiderohej favorit, por ai e mposhti në vitin 1996 Tyson me “KO” në raundin e 11-të. ”Ai është një njeri shumë karizmatik dhe që meriton shumë vëmendje”, ka thënë regjizori i dokumentarit.
