Tre persona kanë mbetur ‘viktima të një batareje armësh në qytetin e Dordrecht” në jug të Holandës. Kështu njofton policia holandeze në Twitter. Sipas mediave vendase, të shtënat me armë kanë ndodhur në brendësi të një banese. Po kështu bëhet e ditur se një person i katërt ndodhet në gjendje kritike për jetën.
Fillimisht policia tha se “shumë njerëz” ishin qëlluar në një rrugë banimi në skajin jugor të qytetit. Por oficerët në qytetin e afërt të Roterdamit konfirmuan më pas se tre persona kishin vdekur dhe një ishte plagosur rëndë. Një hetim për atë që ka ndodhur është duke u zhvilluar.
Policia tha se ekipet e urgjencës ishin në vendngjarje për të trajtuar viktimat dhe për të hetuar. Kryetari i Bashkisë së Dordrecht, Wouter Kolff ka shkruar në Twitter se ka pasur “një incident shumë të rëndë me të shtëna” dhe se ai po shkonte drejt vendit të ngjarjes.
Pamjet e postuara në mediat sociale treguan se një turmë ishte mbledhur përballë shtëpisë, e mbajtur pas nga një kordon policie. Ambulancat dhe makinat e policisë ishin në rrugë, e cila dukej si një rrugë e zakonshme banimi.
Dordrecht është një qytet dhe bashki në Holandën Perëndimore, i vendosur në provincën e Holandës së Jugut. Është qyteti i pestë më i madh i krahinës pas Roterdamit, Hagës, Zoetermeer dhe Leiden, dhe ka një popullsi prej 118.450 njerëz.
