Mbretëria e Holandës është duke negociuar me Shërbimin e Jashtëm të Bashkimit Evropian (EEAS) për vendosjen e Dhomave të Specializuara në këtë shtet, derisa zyrtarë nga Ministria e Punëve të Jashtme (MPJ) thonë se tashmë kanë ardhur kërkesa që sa më shpejtë të nisin negociatat me Holandën, shtet pritës në të cilin do të vendoset qendra kryesore e kësaj gjykate.
Kosova e Holanda pritet që brenda pak ditësh t’i nisin negociatat dhe të nënshkruajnë marrëveshje për vendosjen e selisë kryesore të Dhomave të Specializuara që pritet të jenë në Hagë. Pas miratimit të amendamenteve dhe Ligjit për Gjykatën Speciale tashmë i është hapur rruga që menjëherë në fillim të vitit që vjen të bëhet funksionalizimi i Dhomave të Veçanta dhe të ngrihen aktakuzat e para me pretendime se janë kryer krime gjatë periudhës së luftës së UÇK-së.
Zyrtarë qeveritarë thonë se Ministria e Punëve të Jashtme që drejtohet nga Hashim Thaçi do të udhëheqë procesin e negociata me shtetin holandez që pritet të rezultojë me një marrëveshje, e cila më pas duhet të sillet për ratifikim në Kuvend të Kosovës.
