Edhe ambasadori gjerman në vendin tonë Hellmut Hoffman u është drejtuar me një mesazh të gjithë qytetarëve në prag të zgjedhjeve vendore të 21 Qershorit. Përmes një mesazhi publik, ambasadori Hoffman u bën thirrje qytetarëve që të marrin përgjegjësi për të ardhmen e vendit dhe të shkojnë e të votojnë.
Hoffman thekson se tashmë Shqipëria si një vend kandidat për në BE do të ketë një vëmendje edhe më të madhe për këto zgjedhje vendore, duke shtuar se ato duhet të zhvillohen konform ligjit dhe transparencës.
“Zgjedhjet në një sistem demokratik janë shumë të rëndësishme, sepse qytetarët kanë kështu mundësinë të përcaktojnë se kush do të duhet të drejtojë fatet politike të vendit. Zgjedhëset dhe zgjedhësit shqiptare/ë mund të vendosin ditën e djelë, se kush do të përfaqësojë interesat e tyre në nivel lokal vitet e ardhshme. Kjo është një mundësi për të bashkëformësuar të ardhmen e Shqipërisë dhe shpresa ime është, që shumë shqiptarë të përdorin të drejtën e tyre për të zgjedhur. Vetëm kush shkon të votojë merr përsipër përgjegjësitë, që i takojnë një qytetari aktiv! Pikërisht në një vend, që është kandidat për anëtarësimin në Bashkimin Evropian, zgjedhjet vëzhgohen me vëmendje të vecantë në nivel ndërkombëtar, duke qenë se janë një test i rëndësishëm për zhvillimin e demokracisë, e për këtë arsye është tejet e rëndësishme që ato të zhvillohen në mënyrë transparente dhe ligjore.” shprehet ambasadori i Gjermanisë