Spanja është mbërthyer nga një debat i ashpër pas përplasjes më të fundit mes Barcelonës dhe Realit të Madridit.
Gjithçka nisi me deklaratën e bërë nga presidenti i katalanasve, Joan Laporta, i cili gjatë mbrojtjes që i bëri klubit të tij për çështjen “Negreira” akuzoi Realin e Madridit si “klub të regjimit” dhe që ka përfituar për 7 dekada me radhë. Përgjigjja e Realit të Madridit ishte e menjëhershme, me klubin madrilen që akuzoi Barcelonën – nëpërmjet televizionit të klubit “realmadridTV”- që ka pasur lidhje me diktatorin e Spanjës, Fransisko Franko.
Videoja e klubit të Realit shkaktoi reagime edhe më të ashpra se deklarata e Laportës. Ajo çoi deri në reagimin e qeverisë autonome të Katalonjës, që i kërkoi klubit madrilen të hiqte videon nga qarkullimi dhe të mbante qëndrim. Ndërkaq, gazeta spanjolle “Marca” ka publikuar një speciale me foto në lidhje me disa prej figurave historike – për mirë apo për keq – dhe simpatisë së tyre për futbollin dhe skuadrat e zemrës.
Natyrisht që diktatori i Spanjës, Franko, është lënë jashtë, teksa në listë janë përfshirë një sërë figurash të rëndësishme të Spanjës së kohëve moderne, mes të cilëve ishkryeministra, por dhe mbretin Huan Karlos i apo mbretin emeritus Felipe VI. Në këtë listë të veçantë bëjnë pjesë dhe figura të urryera si Josif Stalin apo Adolf Hitler e Augusto Pinoçet apo politikanë më të vonshëm si ish-presidenti i Francës, Nikolas Sarkozi, e ai aktual Emanuel Makron apo ish-kancelarja e Gjermanisë, Angela Merkel.
