Qeveria ka vendosur të lehtësojë procedurat por dhe ngarkesën fiskale për sektorin minerar në Shqipëri, si një ndër më të prekurit nga pandemia e Covid, për shkak të rënies së kërkesës nga jashtë.
Kuvendi i Shqipërisë miratoi në seancën e fundit plenare përjashtimin nga taksa e rentës minerare të gjithë grupet e mineraleve metalorë: kromi, bakri, nikeli, zinku etj. për 3 vjet.
Njëkohësisht me këtë nisëm, Këshilli i Ministrave ka vendosur të ndryshojë edhe ligjin e këtij sektori, duke lehtësuar procedurat dhe kërkesat për derdhjen e garancive financiare nga shoqëritë që operojnë në këtë treg.
Aktualisht ligji kërkon që çdo vit kompanitë e këtij sektori të lenë garanci vlerën e investimit të ngrirë, ndërsa ligji i ri i detyron ato të lenë vetëm 10% të kësaj shume.
Qeveria do të shtyjë edhe afatin e vlefshmërisë së lejes së kërkim – zbulimit me 1 vit tjetër, ndërsa i jep të drejtë kompanive të transferojnë të drejtat e tyre edhe në kompani të tjera, pas 5 vjetësh shfrytëzimi të lejeve.
Eksportet e mineraleve, lëndëve djegëse dhe metaleve e materialeve të ndërtimit u tkurrën këtë vit me 140 milionë dollarë për periudhën janar-nëntor, krahasuar me një vit më parë.
/a.r
