Duket se një “makth” 12 vjeçar po shkon drejt fundit: Aeroporti i Rinasit nuk do të jetë më e vetmja portë hyrëse në Shqipëri. Pas shumë negociatash, qeveria shqiptare ka rënë dakord me koncesionarin gjerman të Aeroportit të Rinasit, për heqjen e ekskluzivitetin mbi fluturimet civile.
Ministri i Ekonomisë, Arben Ahmetaj deklaroi sot se ka përfunduar marrëveshja për heqjen e ekskluzivitetit me një rreze prej 100 kilometrash. Kjo do të thotë se hapet mundësia e funksionimit të një aeroporti si ai i Kukësit. Por ky është vetë fillimi. “Dosja është dërguar tek bordi i koncesionarit. Presim oferta për realizimin e aeroporteve lokale”, u shpreh Ahmetaj.
