Gjendja e tij shëndetësore u përkeqësua menjëherë, por edhe pasi i ndjeri kishte kërkuar ndihmë ekonomike për t’u kuruar, shteti dhe qeveria e kohës e injoroi rastin e tij.
Xhevat Hana qëndroi i shtruar për një kohë të gjatë në një spital publik të Tiranës, pa asnjë diagnozë, derisa familja dhe miqtë e tij u detyruan ta çojnë në Turqi me shpenzimet e tyre. Kryeministri Berisha nuk pranoi t’i paguante nga fondi i qeverisë shpenzimet për sëmundjen e tij. Mjekët nuk dhanë dot ndonjë konkluzion për arsyen e sëmundjes.
Xhevat Hana ishte një nga prokurorët më të njohur të Shqipërisë, me një karrierë të gjatë në drejtësi, për disa kohë dhe si këshilltar i presidentit Alfred Moisiu. Ai ishte prokuror i çështjes së zhdukjes së biznesmenit kosovar Remzi Hoxha në vjeshtën e vitit 1995 nga shërbimi sekret shqiptar. Prokurori Xhevat Hana është nga zyrtarët e pakët të drejtësisë shqiptare që i ka qëndruar deri në fund kësaj çështje dhe ka kërkuar ekstradimin e Kumbaros në Shqipëri.
Sëmundja e tij e pashpjegueshme nga mjekët ka shtuar dyshimet dhe tek profesioni i tij. Ishte ndër ata personazhe “të pazakontë” të sistemit të drejtësisë shqiptare që sot më fort se kurrë, mungojnë disafish. Ka mbetur proverbial në qarqet e drejtësisë dhe opinionit publik, një fakt “i vogël”, por kuptimplotë: Që Xhevat Hana e nisi dhe e përfundoi karrierën e tij në drejtësi, në një njëjtin apartament modest parafabrikat në periferi të Tiranës. Edhe pse gjithë ditën flitet për drejtësinë dhe reformimin e saj pesë vjet pas vdekjes Xhevatin nuk e kujtoi askush veç familjes së tij, e cila i dërgoi gazetës këtë mesazh në foto. (Dita)
/ma.me
