Në Këshillin e Lartë të Drejtësisë nuk është përcjellë asnjë informacion mbi tre gjyqtarë të dyshuar se kanë shkelur ligjin, megjithëse në deklaratën zyrtare të Prokurorisë së Përgjithshme e datës 22 prill, pohohet se do të njoftohet KLD.
Burime jozyrtare konfirmuan se organi qendror i akuzës nuk ka dorëzuar asnjë material pranë këtij institucioni, ndërkohë që as Inspektoriati i KLD dhe as inspektorët e Ministrisë së Drejtësisë nuk kanë nisur verifikime për çështjen që Prokuroria e Përgjithshme akuzoi gjyqtarët se kishin dhënë një vendim të paligjshëm për ish-Vollgën.
Emrat e tre gjyqtarëve të Durrësit, Dhurata Bilo, Vladimir Skënderi dhe Ndue Gjura, aktualisht inspektor në KLD, u publikuan si të dyshuar për shpërdorim detyre për një vendim të 2013-ës, një praktikë kjo që rrallë është ndjekur në gjyqësor.
Në kulmin e veprimeve hetimore në adresë të Emiljano Shullazit dhe sekuestrimit të ish-hotel Vollgës, prokuroria shkoi akoma më tej duke thënë se tre gjyqtarët kishin dhënë një vendim duke kryer gjykim paralel.
Sipas Prokurorisë në vendimin civil, gjyqtarët urdhëronin hipotekën të regjistronte si pronar të ish-Vollgës shtetasin Mohamed Abdullah Bavazer, në një kohë që çështja ishte nën shqyrtim në Gjykatën e Lartë.
Prokuroria tha se ndaj tyre kanë nisur hetimet, por si inspektori Gjura, si dhe dy gjyqtarët vijojnë detyrën dhe nuk është marrë asnjë veprim procedurial që t’u hapte rrugë hetimeve çka hedh dyshime mbi seriozitetin e njoftimeve zyrtare të Prokurorisë së Përgjithshme. / topchannel / r.a
