Ish drejtuesit e OSHEE-së mohojnë që kompania të jetë përfshirë në marrëveshje me tregtarët privat të energjisë, në tenderat e zhvilluar përgjatë gjysmës së dytë të vitit 2013 dhe muajve të parë të 2014-ës.
Ish-drejtori, Arben Seferi, tha jashtë kameras se tenderat janë zhvilluar në përputhje me ligjin. Sipas tij, hetimi i Autoritetit të Konkurrencës ka nisur pas ankesave të pabazuara të një kompanie private, e cila ka patur për qëllim të bëjë presion ndaj OSHE-së për të përfituar tendera në mënyrë të paligjshme.
Seferi ka sqaruar edhe dyshimet për diferencën e çmimeve të blerjes së energjisë mes OSHEE dhe KESH, një nga pikat më të nxehta të hetimit. Sipas tij, shkaku i kësaj diference është pagesa për linjat e transmetimit, të cilin KESH e merrte falas nga shteti, ndërsa OSHEE, në atë kohë ende e pashtetëzuar, duhet ta blinte nga OST.
Vetëm ky shkak sipas Seferit e rriste çmimin e blerjes së energjisë nga OSHEE deri në 12 euro për cdo megavat. Paralelisht ish kreu i OSHEE-së rikujton se bëhet fjalë për një situatë kur rezervat hidrike të vendit ishin në minimum, pasi niveli i ujit në Fierzë ishte vetëm pak metra mbi pikën kritike ku hidrocentrali nuk mund të prodhojë më.
Ndaj sipas tij, energjia është blerë me çmime optimale dhe se hetimi është thjesht një shou. Një ditë më parë Autoriteti i Konkurrencës deklaroi se po heton mundësinë e përfshirjes së OSHEE-së në marrëveshje të ndaluara me kompanitë private.
Top Channel
