Shtatë gazeta të mëdha europiane, Die Welt, El Pais, La Repubblica, Le Soir, Le Figaro, Tages-Anzeiger dhe Tribune de Geneve, kanë kryer një hetim në lidhje me efektet financiare që ka pasur mbi Bashkimin Europian, stina e sanksioneve të vendosura ndaj Rusisë së Putinit. Këto sanksione, sipas mediave prestigjioze, do t’i kushtojnë në të ardhmen e afërt BE, rreth 100 miliard euro.
Nga ana tjetër, përveç humbjeve të mëdha financiare, Europa e Bashkuar parashikohet të humbasë edhe rreth 2 milion vende pune për shtetasit e saj.
Ndërkaq, edhe Rusia duket se do të paguajë një çmim të kripur për shkak të embargos europiane. Sipas studimit të shtatë mediave në fjalë, Banka Qëndrore e Moskës ka djegur deri tani një rezervë valutore që vlerësohet në 150 miliard dollarë. Kurse rënia e kërkesës europiane për naftë dhe ulja e çmimit të arit të zi, i ka kushtuar arkës ruse 140 miliard dollarë të tjera humbje.