Kompanitë e telefonisë i kanë kthyer përgjigje Prokurorisë, duke konfirmuar faktin se Emiljano Shullazi sipas tyre nuk ka numër telefoni të regjistruar në emrin e tij, të paktën dy vitet e fundit, periudhë për të cilën kompanitë ruajnë të dhënat për klientët.
Nga kjo përgjigje, Prokuroria nuk mundet të nxjerrë asnjë informacion nga thirrjet telefonike të Shullazit, pasi sipas kompanive celulare, ai nuk përdorte asnjë kartë të regjistruar në emër të tij raporton Panorama.
Shullazi duket se ishte shumë i kujdesshëm me përdorimin e telefonave. Sipas hetuesve, Shullazi mund të ketë përdorur celularët e personave të tjerë që mbante pranë tij. Sakaq, prokuroria po verifikon numrat e personave të tjerë që rrinin në krah të Shullazit apo familjarëve të tyre.
Emiljano Shullazi, person me precedentë të mëparshëm penalë është arrestuar pasi akuzohet se në bashkëpunim me dy shokë të tij, u vinte gjobë biznesmenëve të ndryshëm dhe i kërcënonte më pas.
