Prokuroria ka sekuestruar të gjitha bisedat e raportuara në sallën operative nga efektivët e policisë lidhur me ngjarjen e rëndë ku mbeti i vrarë 25-vjeçari Klodian Rasha.
Të gjitha bisedat janë marrë nga sistemi TIMS, aty ku edhe regjistrohen. Në dosjen hetimore të prokurorisë cilësohet se si dy efektivët kanë raportuar dhe kanë kërkuar përforcime në drejtim të rrugës “Dritan Hoxha”, aty ku dhe u bë ndjekja e Klodian Rashës.
Policia, për verifikim, mësohet të ketë thënë oficeri që përdori armën. Sipas të dhënave të siguruara nga prokuroria, oficeri i ka kërkuar Rashës të ndalojë rreth orës 01 e 10 minuta pas mesnate e në momentin që ai është larguar me vrap, e ka ndjekur për disa metra.
Efektivi i Shqiponjave, gjatë ndjekjes, ka thënë për prokurorinë se në një moment i dyshuari është kthyer dhe se i ka thënë mos u afro se do të të qëlloj. Kaq ka mjaftuar që efektivi të bërtasë “Armë”, në mënyrë që të ishte një formës injalizuese për oficerin tjetër, i cili menjëherë ka bërë raportimin në sallën operative.
Gjatë ndjekjes, ndonëse kanë tentuar t’i dalin para, 25-vjeçari ka bërë të njëjtën gjë edhe me efektivin tjetër duke e kërcënuar se do ta qëllonte. Një tjetër raportim në radio është dëgjuar gjatë kohës kur i riu ka qenë duke u larguar në rrugicat që të nxjerrin në ish-Drejtorinë e Përgjithshme të Doganave se i riu mbante armë.
Oficeri që përdori armën gjatë ndjekjes u rrëzua dhe qëlloi në drejtim të të riut. Njëri nga plumbat nuk e preku, ndërsa plumbi i dytë i preku zemrën pas shpatullave. Efektivi përballet me akuzat e kapërcimit të kushteve të mbrojtjes dhe përdorimit të armëve, ndërsa prokuroria kërkon arrest me burg.
/a.r
