Aksidenti rrugor me asojë vdekjen e 32 vjeçares Bujana Bushi ngriti një sërë misteresh mbi punën e policisë, për shkak të pretendimeve të familjarëve se forcat e rendit e kanë mbajtur të fshehur këtë ngjarje dhe se janë zhdukur 100 mijë euro.
Por kur dukej se shuma e parave të ishte sekuestruar nga Prokuroria në cilësinë e provave materiale, vjen përgënjështrimi i vetë organit të Akuzës, i cili në fakt thekson se provat materiale nga aksidenti i së enjtes së 30 Korrikut në aksin Kavajë-Rrogozhinë, të kenë ardhur 4 orë pas reagimit të policisë.
Këtu ngjarja merr përmasat e një skandali, të autoriteteve që nuk arrijnë të japin një shpjegim, se ku kanë humbur jo pak, por 100 mijë euro. Kjo pasi kudo që të jenë paratë, të fshehura në xhepin e ndonjë polici apo prokurori të korruptuar, apo ndoshta edhe tek ndonjë familjar që “hesht”, kjo sërish do të ishte skandal.
Nisur nga kjo situatë, Policia e Tiranës ka nisur hetimet lidhur me pretendimet e familjarëve të Bujana Bushit. Burime nga policia thonë se për rastin në fjalë është ngritur një grup hetimor, i cili ka nisur hetimet për zhdukjen e 100 mijë eurove. Lidhur me këtë aksident janë pyetur 4 punonjësit e Policisë Rrugore të Kavajës, që kanë qenë në vendngjarje ditën e aksidentit. Burime policore bëjnë me dije se 4 efektivët kanë mohuar që ditën e aksidentit të kenë konstatuar para në mjetin tip “Benz” me targë AA 837 GH ku udhëtonte viktima. Ata kanë deklaruar se kanë administruar sende personale dhe çantën e Bujana Bushit, por jo para.
Ndërkohë nga ana tjetër, kanë nisur njëkohësisht edhe hetimet për të verifikuar nëse kanë qenë ose jo 100 mijë euro, shuma që viktima 32 vjeçare ka pasur në çantë, siç pretendojnë familjarët.
Kjo pasi siç shprehen burime nga policia, në fakt nuk ka ende asnjë faturë apo veprim bankar që të faktojë se Bujana Bushi zotëronte 100 mijë euro cash. Në këtë mënyrë, duke marrë parasysh edhe faktin se 100 mijë euro është një shumë e madhe për t’u mbajtur cash në çantë, uniformat blu po hetojnë edhe mbi shumën e pretenduar.
Sido që të jetë e vërteta, të 100 mijë eurove që zhduken sikur të mos viheshin re aspak, apo edhe të një pretendimi që ngre shumë dyshime për shumën, jemi përpara një skandali që ende nuk ka shpërthyer. Por është pranë…
