Komiteti Shqiptar i Helsinkit ka reaguar ditën e sotme në lidhje me debatet mes ambasadorit amerikan dhe Prokurorit të Përgjithshëm.
“Duke marrë shkas nga komunikata e djeshme për shtyp e Prokurorit të Përgjithshëm në drejtim të Ambasadorit të Shteteve të Bashkuara të Amerikës, Z. Donald Lu, me keqardhje konstaton se, ky komunikim nuk është as i përshtatshëm dhe as i shëndetshëm për zbatimin e reformave në vendin tonë” – shkruan KShH.
Sipas organizatës në fjalë, Prokurori i Përgjithshëm dhe çdo prokuror tjetër i Shqipërisë duhet të operojë duke hetuar dhe vendosur mosfillimin, pushimin apo dërgimin e çështjes penale për gjykim në rast akuzash.
Ne reagimin e sotëm për mediat, KShH vlerëson ndihmën e dhënë për vendin tonë nga Shtetet e Bashkuara të Amerikës me anë të Zyrës së OPDAT.
Komiteti i Helsinkit shkruan se kritikat nga ambasadorët duhen marrë në konsideratë ashtu sikurse pranohen edhe vlerësimet pozitive që ata kanë.
“Qendrimet e partnerëve ndërkombëtarë duhet të mirëkuptohen jo vetëm kur shprehin vlerësime për funksionimin e institucioneve të shtetit shqiptar, por edhe kur ato ngrenë shqetësime dhe kritikojnë funksionin jo të duhur të këtij sistemi” – shkruan KShH.
Organizata shprehet se këto janë qëndrime të partnerëve që vijnë nga vende me demokraci e institucione të konsoliduara të shtetit të së drejtës dhe kontribuojnë në integrimin e vendit tonë në familjen evropiane.
“Në mënyrë të veçantë vlerësojmë kontributin e Zotit Donald Lu, ambasadorit të SHBA-së në vendin tonë, i cili me dashamirësi dhe korrektesë ka nxitur miratimin e e kësaj reforme” – përfundon deklarata. /b.d
