Jacob Helberg, ish-drejtues i lartë në kompaninë amerikane Palantir dhe aktualisht nënsekretar i ri i Shtetit për Ekonomi në administratën Trump, ka dërguar një mesazh të qartë për Evropën “Armiku i përbashkët nuk janë Shtetet e Bashkuara, por Kina.”
Në një intervistë për gazetën italiane Corriere della Sera, Helberg argumenton se Evropa po e humbet fokusin strategjik duke u përqendruar te tensionet tregtare me SHBA-të, ndërsa “po bëhet viktimë e një lufte ekonomike agresive” të Pekinit.
“Europa po sheh në drejtimin e gabuar”
“Shumë në Bruksel flasin për konkurrentët amerikanë dhe rregullat e Digital Services Act, por problemi i vërtetë është Pekini”, tha Helberg.
Sipas tij, kompanitë kineze po dëmtojnë rëndë industrinë evropiane, nga automobilët gjermanë te teknologjia e pastër.
“Prodhuesi kinez BYD po ushtron presion të jashtëzakonshëm ndaj markave gjermane, dhe kjo po ndodh në çdo sektor”, thekson ai.
Helberg kërkon që shtetet e BE-së të rishikojnë marrëdhëniet tregtare me Kinën dhe të ndërmarrin masa për të “mbrojtur industrinë vendase dhe për të garantuar konkurrencë të ndershme”.
“Nevojitet një bazë industriale perëndimore”
I pyetur për politikat proteksioniste të Donald Trump dhe tarifat prej 15% ndaj importeve, Helberg theksoi se qëllimi i Uashingtonit është rivendosja e prodhimit industrial në Perëndim, jo dëmtimi i Evropës.
“Ne kemi nevojë për një bazë të fortë prodhuese. Kjo nuk është vetëm çështje amerikane, edhe Evropa e ka të domosdoshme. Problemi nuk jemi ne. Problemi është Kina”, deklaroi ai.
Evropa përballë revolucionit të inteligjencës artificiale
Helberg paralajmëroi gjithashtu se Evropa rrezikon të mbetet pas në garën globale të inteligjencës artificiale (AI), për shkak të “prirjes së tepruar për rregullim burokratik”.
“IA është si revolucioni i parë industrial”, tha ai.
“Ekonomitë që e integrojnë atë do të rriten me ritme që s’janë parë prej dy shekujsh. Por rregullat e Brukselit po e vendosin Evropën në disavantazh të madh, pavarësisht talenteve që ka.”
Sipas Helberg, kompanitë që kanë përqafuar inteligjencën artificiale “po përjetojnë tashmë rritje të produktivitetit deri në 40%”.
“Nuk e kam blerë postin tim”
Pasi ka dhuruar miliona dollarë për fushatën presidenciale të Donald Trump në 2024, Helberg u pyet nëse kontributet e tij financiare e ndihmuan të fitonte postin në Departamentin e Shtetit.
“Janë çështje të ndara”, tha ai.
“Presidenti dëshiron një ekip që di si të zbatojë programin America First.”
