Konsorciumi i kompanisë turke “Ayen Enerji” me atë shqiptare “Fusha” është shpallur fitues për ndërtimin e hidrocentralit të Kalivaçit.
Ministria e Infrastrukturës dhe Energjisë njoftoi se ka shpallur fituesin e tenderit për dhënien me koncesion të hidrocentralit që kushton 125.3 milionë euro.
Në tenderin ndërkombëtar u paraqitën tre ofertues, shoqëria “Doko Sh.p.k.”, bashkimi i kompanive “Gener 2” dhe “Favina”, si dhe konsorciumi i kompanisë turke “Ayen Enerji” me atë shqiptare “Fusha Sh.p.k.”. Pas hapjes së ofertave, ministria ka shpallur fitues pikërisht konsorciumin “Ayen Enerji”-“Fusha”.
Ndërtimi i hidrocentralit në lumin e Vjosës do të zgjasë dy vite e gjysmë. Ai do të ketë një fuqi të instaluar prej 120 megash dhe do të prodhojë 366.6 milionë kilovat/orë energji në vit.
Ndërtimi i HEC-it të Kalivaçit nisi 20 vite më parë përmes koncesionit nga një kompani italiane. Por projekti nuk u realizua. Vitin e kaluar, shteti shqiptar vendosi ta rihapë tenderin për hidrocentralin.
Në procedurën konkuruese, ministria thotë se ka vendosur kritere specifike të vlerësimit të ofertave më qëllim minimizimin e impaktit mjedisor për përmirësimin e projektit të mëparshëm, duke marrë në konsideratë vërejtjet dhe sugjerimet e bëra nga grupe të ndryshme interesi.
Po ashtu, sipas MIE-s ju kushtua rëndësi e veçantë aspekteve të impaktit në mjedis të projektit, si në drejtim të sipërfaqes që do të preket duke synuar zvogëlimin e saj, ashtu dhe në planifikimin e masave për uljen e impaktit në rrjedhën ujore, duke planifikuar ndërtimin e rrugëkalimit për peshqit me anë të një Bypass-i të posaçëm.
