Ministri i Transportit dhe Infrastrukturës, Edmond Haxhinasto ka zhvilluar disa inspektime përgjatë rrugës Milot-Morinë.
Ministri u ndal edhe te aksidentet rrugore të kohëve të fundit. Haxhinasto theksoi se për një siguri më të lartë rrugore, duhet të forcohet më shumë elementi i “policimit” në rrugë.
“Në fakt, shifrat janë shumë të sakta që sinjalistika në mënyrë të drejtpërdrejtë ka ndikuar në uljen e aksidenteve me vdekshmëri, por në disa segmente ka pasur aksidente me pasoja të rënda. Mendoj se përmirësimi i standartit të rrugëve mund t’i motivojë njërezit të ecin më shpejt dhe të injorojnë ato detyrime që kanë ndaj rregullave të qarkullimit dhe kjo nuk duhet të ndodhë. Çështja e sigurisë rrugore është padyshim çështje e standartit të rrugës, të investimeve që bëhen në të, por jo vetëm. Është gjithashtu një çështje e “policimit” të rrugëve dhe besoj se ka nevojë për forcimin e “policimit” të rrugëve. Është gjithashtu çështje e cilësisë dhe e kontrollit të procesit të dhënies së lejeve të drejtimit, pra është një çështje e edukimit. Është çështje e njohjes së rregullave të qarkullimit, pasi është e qartë që një pjesë e aksidenteve është si pasojë e mosnjohjes së rregullave të qarkullimit. Sot, 70% e aksidenteve ndodhin si pasojë e faktorit njerëzor. Ne kemi filluar një plan kombëtar të sigurisë rrugore që e rishikojmë herë pas here dhe e përmirësojme në bazë të kërkesave të momentit. Besoj se është momenti të forcohet elementi i edukimit, trajnimit si të përdoruesve të rrugës, si të drejtuesve të mjeteve ashtu edhe këmbësorëve, por veçanërisht forcimi i elementi të “policimit” të rrugëve të vendit”, tha Haxhinasto.
TCH/d.i.
