Në një rrëfim ekskluziv për “Grida Duma Podcast”, Endrit Thaçi ka folur për përballjen e babait të tij, ish-presidentit të Kosovës Hashim Thaçi, me drejtësinë ndërkombëtare në Hagë dhe për rolin e tij historik në politikën kosovare. 
I pyetur nga Grida Duma nëse beson që ish-presidenti do të rikthehet në jetën politike pas përfundimit të procesit gjyqësor, Endrit Thaçi tha:
“Nuk ka politikan më të përmbushur dhe më të suksesshëm se babai im, ndërsa a do kthehet në politikë apo jo, unë këtë nuk e di, por do ta respektoj çfarëdo vendimi që ai do ta marrë.”
Në një moment tjetër të bisedës, Grida Duma e pyeti drejtpërdrejt nëse politikanët aktualë të Kosovës mund të krahasohen me figurën e Hashim Thaçit.
Endriti u përgjigj me bindje:
“Askush nga ata nuk mund ta kalojë historinë që ka kaluar babi. Babi ka kaluar gjithë historinë e Kosovës që nga themelimi i UÇK-së, nga Rambujea, bisedimet në Vjenë, Pavarësia e deri te shtet-ndërtimi. Kështu që historia flet, nuk ka nevojë të flas unë.”
Ky episod me Endrit Thaçin hapi një seri bashkëbisedimesh të “Grida Duma Podcast”, me rrëfime të forta dhe emocionale nga personazhe të ndryshëm të jetës publike dhe jo vetëm.
Endrit Thaçi në “Grida Duma Podcast”: “Është përgjegjësi e madhe, por krenaria për babain tim është në qiell”
Në një bisedë të sinqertë dhe emocionale me Grida Dumën, djali i ish-presidentit të Kosovës, Endrit Thaçi, ka folur për peshën dhe krenarinë që mbart si biri i Hashim Thaçit, teksa ky i fundit vazhdon të përballet me procesin gjyqësor në Hagë.I pyetur nëse është e vështirë të jesh djali i një figure që ndodhet nën vëmendjen e gjithë opinionit publik, Endriti tha:
“Normal, është një përgjegjësi e madhe, por jam edhe me fat dhe shumë i lumtur që jam djali i tij. Jam djali i një çlirimtari që ka fituar luftën ndaj Serbisë. Jam djali i një arkitekti që ka bërë pavarësinë e Kosovës, bashkë me shokët e tij. Përgjegjësia është e madhe, por krenaria dhe lumturia është në qiell.”
Grida Duma e pyeti gjithashtu për momentet e takimeve në Hagë dhe jetën e përditshme të ish-presidentit në qeli. Endriti tregoi se familja e viziton rregullisht:
“Shkojmë çdo muaj, kemi tre vizita të lejuara. Kur jemi atje diskutojmë për shumë gjëra për familjen, për aktivitetet e tij të përditshme, për librat që lexon. Ai vazhdon të ruajë qetësinë dhe forcën e tij.”
Ky rrëfim në “Grida Duma Podcast” sjell një tjetër dimension të historisë së familjes Thaçi një bashkim midis dhimbjes, dinjitetit dhe krenarisë që nuk shuhet as pas hekurave të Hagës.
