Emrin e mbajnë të njëjtë por nga pikëpamjet e tyre politike dallojnë shumë. Është ky Hashim Thaçi, i LDK-së, i cili mban emrin e njëjtë me ish-kreun e PDK-së, tanimë president në ardhje.
Emrin që mban Hashim Thaçi i LDK-së, thotë se më shumë ia ka parë “sherrin” sesa “hairin”. Sherrin më të madh emrit që mban ia pa para luftës dhe gjatë luftës në Kosovë, ku shpeshherë i ishte rrezikuar edhe jeta.
Ai tregoi se letërnjoftimin nuk kishte guxuar ta merrte asnjëherë me vete, pasi që i figuronte emri Hashim Thaçi.
“Më kujtohet kur është dënuar si student dhe u shua Rilindja, atëherë të gjithë mendonin që unë jam ai Hashim Thaçi. Nuk kaloj shumë kohë dhe ajo u kuptua, sepse edhe unë kam qenë një prej atyre në ekstrem që kemi qenë kundër pushtetit.
Në kohën e luftës, letërnjoftimin as që e merrja me vete sepse si e shihnin emrin Hashim Thaçi… ai ishte në kërkim, por kaloi edhe ajo… Çdoherë është dashur të ruhem, të mos e tregoj letërnjoftimin në kohën e bombardimeve dhe të luftës.
Kurrë nuk kam guxuar ta marr letërnjoftimin me vete, jam frikësuar ta kem me vete letërnjoftimin me emrin e Hashim Thaçit se Hashim Thaçi ka qenë i ndjekur”, tha ai, raporton Kosovapress.
Falë emrit që mban, Hashim Thaçi i LDK-së kishte shpëtuar nga dënimi i policisë disa herë. Kur Policia e Kosovës kishte dashur ta dënonte për parkim pa leje, me të parë emrin e tij, ata ia kishin falur dënimin.
“Çka është me më rëndësi që më ka mbetur në mendje është se isha në një fejesë te djali i vëllait dhe e parkova veturën në një vend jo të duhur. Kur dola ma kishin marrë Policia. I pyeta policinë se ku është, më tregun se ku të shkoja. Kur shkova në polici, më pyetën se a e kam emrin “Hashim Thaçi”, u thash po.
Më thanë: “na fal zotëri Thaçi, veç pak, pritni pak”. U thash se çka është kjo punë, mirëpo njëri polic hyri tek kolegët në zyre e po bisedonin.
Pastaj doli e ma solli dokumentacionin dhe më tha se dënimin prej Policisë nuk po ta shkruajmë hiç por duhet ta paguash veç merimangën që e ka marrë dhe kur u përshëndetëm tha, përshëndete zotëri Hashim Thaçin.
I thash hajt se do ta përshëndes dhe dola… Shkova që ta marr veturën në Fushë Kosovë, e kur edhe ata e panë emrin, i telefonuan Policisë, ‘e kemi Hashim Thaçin këtu’, kurse ata i thanë se janë të vetëdijshëm dhe e kemi liruar ne… Në këtë rast e di që ia kam parë hairin emrit Hashim Thaçit, sepse tjetër ku kurrë hairin s’ia kam parë”, tha ai.
Në një rast tjetër, po ashtu me Policinë e Kosovës, Thaçi tregon se gjithashtu kishte shpëtuar nga dënimi falë emrit të tij.
Por sa i përket emrit të tij të cilin e mban, ai tha se shpeshherë i kanë thënë ta ndërrojë, por ky kishte vendosur ta mbajë, pasi që ishte edhe më i madh në moshë dhe e kishte më herët.
Hashim Thaçi i LDK-së është njëri ndër themeluesit e Degës së Tretë të Presidentit Ibrahim Rugova në Lidhjen Demokratike të Kosovës.
