Më 27 shkurt, të premten e ardhshme, do të nisë “gjykimi i dytë” në Dhomat e Specializuara të Kosovës në Hagë ndaj ish-presidentit të Kosovës Hashim Thaçi, si dhe për Bashkim Smakaj, Isni Kilaj, Fahri Fazliu dhe Hajredin Kuçi.
Siç raporton KlanKosova, kjo seancë gjyqësore vjen pasi Gjykata Speciale vendosi të aprovojë kërkesat për lirim me kusht të Smakajt dhe Fazliut gjatë qëndrimit të tyre në Hagë.
Ndërkohë, mësohet se Thaçi nuk do të jetë i pranishëm fizikisht në sallën e gjyqit, pritet të lidhet me video, pasi është i vetmi i akuzuar për veprën penale “Tentativë për të penguar hetimin ose procesin gjyqësor”, gjë që e pengon të kërkojë lirim me kusht.
Gjykimi është shtyrë 3 ditë për t’u dhënë kohë mbrojtjes së Thaçit të përgatitet.
Prokuroria nuk ka dhënë ndonjë sinjal që procedura do të zgjasë përtej 6 marsit, ndërsa pritet që të gjithë dëshmitarët të përfundojnë dëshminë e tyre deri në këtë datë.
Në Gjykatën Speciale në Hagë u mbajt më 18 shkurt, një prej seancave më të rëndësishme në gjyqin ndaj ish-krerëve të UÇK-së, Hashim Thaçi, Kadri Veseli, Jakup Krasniqi dhe Rexhep Selimi. Ata patën në dispozicion nga 20 minuta për t’iu drejtuar gjykatës me deklaratat e tyre përmbyllëse.
Ish-krerët e UÇK-së ndodhen në qendrën e paraburgimit të Hagës që nga muaji nëntor i vitit 2020. Ndaj tyre janë ngritur akuzat për krime lufte dhe krime kundër njerëzimit.
Prokuroria Speciale në Hagë ka kërkuar 180 vite burg në total (nga 45 vite për secilin). Akuzat e saj janë rrëzuar nga avokatët mbrojtës e të 4 ish-udhëheqësve të UÇK-së. Tanimë, Gjykata Speciale ka kohë 90 ditë për të shpallur vendimin.
