Houston në SHBA është goditur nga stuhia më e keqe në 50 vitet e fundit. Stuhia Tropikale “Harvey” shkaktoi pothuajse 1.27 metra shi në disa zona, në pak ditë. Ky është një rekord në kontinentin amerikan. Mungesa e sistemit të duhur të kullimit në qytetin me 6.5 milionë banorë ka përkeqësuar përmbytjet. Stuhia deri tani raportohet të ketë shkaktuar 30 të vdekur, ndërsa mijëra njerëz kanë braktisur banesat.
Të rrezikuar nga fatkeqësi të tilla natyrore janë kryesisht Teksasi dhe fqinjë të tjerë të Houston. Sipas sistemit të monitorimit të fatkeqësive pranë OKB-së, Amerika, Kina dhe India vuajnë numrin më të madh të sulmeve nga natyra. Këto tre vende renditen të parat si më të prekurat kryesisht 20 vitet e fundit. Këtu përfshihen tërmete, stuhi, përmbytje, vala e të nxehtit e të tjera që shkaktojnë vdekje. Apo që detyrojnë shtetet të shpallin gjendjen e emergjencës.
Që prej vitit 1970 numri i katastrofave natyrore është katërfishuar, duke bërë kështu që bota të përjetojë rreth 400 fatkeqësi në vit. Një tjetër grup të dhënash tregon se edhe në rastet kur nuk ka viktima, sërish dëmet materiale janë të shumta, gjë që shton faturën financiare. Nga raporti i “Munich Re” në ditët e sotme bëhet fjalë për gjashtë herë më shumë ngjarje hidrologjike sesa në vitin 1980.
Vitin e kaluar është shënuar edhe rekordi, shkruan The Economist”. Por megjithëse numri i katastrofave të tilla vazhdon të rritet, numri i viktimave është në rënie. Në vitin 1970 raportohet se 200 mijë njerëz humbën jetën. Kjo shifër është zvogëluar në mënyrë dramatike, falë masave të sigurisë siç janë ndërtimet e përmirësuara të digave, skema e parandalimit të përmbytjeve etj. Për të arritur një mbrojtje edhe më të sigurtë, The Economist shkruan se planifikuesit urbanë duhet të marrin parasysh ngjarjet më ekstreme.
Përgatiti JavaNews
