Ish deputeti e kreu i AAK-së, Ramush Haradinaj nuk ka preferuar që të flasë rreth asaj se cili nga partnerët opozitarë kërkoi anulimin e protestës së thirrur për të shtunën e 26 marsit. Por ka thënë me siguri të plotë se ai ishte që protesta të mos anulohej.
“Nuk po zbres në detaje, por unë kam kërkuar që të mbahet protesta. Aleanca ka kërkuar që të mbahet protesta, dhe për hir të një uniteti të ndërsjellë, kemi rënë dakord për ta shtyrë protestën, për një afat të pacaktuar kohor, një javor apo dhjetë ditë, aq sa mund të jetë koha”, ka thënë ai.
Haradinaj mohon që protesta është anuluar nga frika e një pjesëmarrje të vogël të qytetarëve. Ndërsa përmend festen e Pashkëve, si një nder arsyet e anulimit të protestës.
“Janë disa arsye dhe të natyrave tjera. Ne e kemi ditur se janë Pashkët, sepse dikush tha a e kanë ditur paraprakisht këta se janë Pashkët, e kemi ditur, por ne nuk e kemi ditur se do të ndodhin shpërthime në Bruksel, do të ndodhin probleme tjera.
Jo që e kemi ndier ne një kërcënim por kemi menduar që është më e drejtë që Kosovën me lënë jashtë hartës së lajmeve nëpër mediat botërore, që janë në prag të Pashkëve, me ndonjë lajm që mund të mos ishte i mirë”, ka thënë Haradinaj për KP. Ai ka folur edhe për protestën që është mbajtur në datën e Pavarësisë së Kosovës, por ka thënë se ajo është datë vetëm e Kosovës.
“E kemi përzier dhe ditën e flamurit ose 28 nëntorin, por është datë vetëm e shqiptarëve, Pashkët janë më shumë, janë të krejt botës. Dhe kemi vlerësuar që temat tona të brendshme s’po i ndërlidhim me një datë të tillë, se është fetare e shpirtërore dhe kemi vlerësuar që të mos mbahet.
Ka dhe argumente tjera, iu thash se ka plot argumente, ka paqartësi, ka dallime. Por jo se jemi frikësuar për numër. Iu them të drejtën ne në Aleancë, kemi besuar që ka pasur mjaftueshëm përkrahje të qytetarëve për protestë”, theksoi Haradinaj.
