Kryeministri Ramush Haradinaj, ka thënë se versioni i tanishëm i kufirit Kosovë-Mali i Zi është i gabuar.Haradinaj vazhdon të insistojë se kufiri Kosovë-Mali i Zi, është në Çakorr, Kullë dhe në majat e larta.
“Parimet e mia politike nuk bazohen në rast të opozitës apo pushtetit, unë mbroj atë që besoj dhe deklarohem për atë që besoj.
Versioni i tanishëm i marrëveshjes është i gabuar. Kufiri Kosovë-Mali i Zi është në Çakorr dhe në Kullë dhe në majat e larta, pra ne do të korrigjojmë këtë”, ka thënë Haradinaj në një intervistë për Zërin e Amerikës,duke shtuar se shpejtë do të gjendet një zgjidhje për të dalë nga kjo situatë, gjithashtu për të bërë liberalizimin e vizave.
‘Është një fat i madh që Mali i Zi është një vend fqinj, ne ju kemi gëzuar përparimeve të Malit të Zi, veçanërisht anëtarësimit në NATO e që synojmë edhe ne të anëtarësohemi në NATO dhe nuk shoh vështirësi të mëdha në këtë temë.
Pra, besoj që do të gjendet një dalje e shpejtë nga gjendja ekzistuese, por nuk po precizoj tani cilët hapa do të ndërmarrim por do të gjendet një dalje e shpejtë nga kjo gjendje dhe nuk do të vonojmë as liberalizimin e vizave”, ka shtuar ai.
Haradinaj ka thënë se ratifikimi i Malit të Zi për marrëveshjen për kufirin e Kosovës, nuk është e mbyllur, pasi siç thotë ai, duhet ratifikuar edhe nga parlamenti i Kosovës.
“Një marrëveshje është e mbyllur kur e ratifikojnë dy parlamente e jo njëri, sepse është marrëveshje ndërkombëtare dhe si e tillë ajo mund të kthehet edhe në pikën zero, pra nëse nuk e ratifikon edhe pala tjetër”, ka thënë Haradinaj.Haradinaj ka thënë se do të ketë edhe ekspertizë të rë në çështjen e kufirit Kosovë-Mali i Zi.
“Marrëveshja për mua ka gabime, pra për mua, besoj që këto gabime do t’i identifikojmë, me siguri do të kemi edhe ekspertizë të re, pra ekspertë tjerë nga ata që kanë punuar në të kaluarën nga zoti (Murat) Meha dhe të tjerë dhe ata gjejnë të vërtetën, pra marrëveshja ka gabime.
Nuk dëshirova të precizoj metodologjinë sepse është herët për të paralajmëruar atë, por janë dy opsione; gjetja e këtyre gabimeve dhe negocimi me Malin e Zi për dakordim, korrigjimi pra në mënyrë që ta miratojmë edhe këtu në Kosovë dhe në Mal të Zi dhe është mënyra tjetër që me ja dërgu parlamentit këtë marrëveshje për votim por duke i thënë që ne e dimë që ka gabime dhe rrëzojeni.
Nuk ka rrugë tjetër nuk mbesin të përjetshme këto situata, pra unë do të veproj, nuk do ta lë pa kufi këtë pa epilog’, ka përfunduar Haradinaj. (b.an)
