Është hapur për qarkullimin e automjeteve tuneli numër 4 në nyjen “Shqiponja”. Përmes tij do të bëhet qarkullimi i automjeteve që dalin nga Tirana në drejtim të Durrësit, duke lehtësuar kështu qarkullimin në hyrje të kryeqytetit.
“Kemi bërë hapjen e tunelit të 4. Nga Tirana automjetet që dalin nga Tirana, pra që vijnë nga pallati me Shigjeta dhe nga ura e lidhjes me TEG-un kalojnë në tubin e 4 për të dalë në autostradën në drejtim me Durrësin. Këto nuk janë lëvizjet definitive që do të ketë projekti në përfundim të tij, pra në Dhjetor të 2021, kur projekti të përfundojë nuk do të jenë këto lëvizjet e tubave. Këto tunele po hapen paraprakisht për të pasur një shfryrje të trafikut. Trafiku e dimë që nuk ka qenë i lehtë për t’u menaxhuar. Gjejmë momentin për t’i kërkuar ndjesë qytetarëve për orët që kalojnë në këtë aks, por duhet kuptuar që është një kantier i madh. Shpresojmë që brenda 2 javësh të hapim tunelin e tretë i cili do të facilitojë drejtimin nga Durrësi në drejtim të Tiranës”, tha Balluku.
Autoritetet janë shprehur se hapja e tuneleve do të ishte bërë më parë nëse do të kishte ndihmuar moti i mirë. Punimet në Sheshin Shqiponja parashikohet të përfundojnë në Shkurt të vitit të ardhshëm, ndërsa autoritetet thonë se vepra do të jetë gati në Dhjetor të këtij viti në bazë të ecurisë së shpejtë që kanë patur punimet.
Unaza e Madhe e kryeqytetit përbën një segment prej 27 kilometrash të gjatë, e cila do t’i kushtojë në total buxhetit një vlerë prej 330 milionë eurosh. Rruga projektohet të jetë gati e gjitha në vitin 2023.
/a.r
