Në Pekin u mbajt ceremonia e nisjes së Fushatës “UN@80” me Kinën dhe Ekspozitës Pamore Globale të të Rinjve “Një botë: E ardhmja e përbashkët”. Kjo veprimtari u organizua nga CGTN-i në bashkëpunim me agjencitë e OKB-së në Kinë. Diplomatë, përfaqësues të agjencive të OKB-së dhe profesionistë të medies ishin të pranishëm në paraqitjen e veprave të shquara nga Sfida Pamore Globale e të Rinjve “Një botë: E ardhmja e përbashkët”, së bashku me fillimin e programit të posaçëm të CGTN-it për 80-vjetorin e Kombeve të Bashkuara (OKB). Duke përkujtuar 80-vjetorin e OKB-së, veprimtaria theksoi rolin kryesor të kësaj organizate në çështjet globale dhe bëri thirrje për krijimin e një sistemi më të drejtë e më të barabartë të qeverisjes
Shen Haixiong, drejtor i përgjithshëm i Grupit Mediatik të Kinës (CMG), theksoi angazhimin e CMG-së për përforcimin e zërit të OKB-së, njoftimin e proceseve të qeverisjes globale dhe ndërtimin e urave midis Kinës dhe botës, për të hequr paragjykimet nëpërmjet imazheve dhe për të sheshuar dallimet nëpërmjet veprave, duke thelluar jehonën e vizionit të bashkësisë me të ardhme të përbashkët për njerëzimin.
CGTN-ja e nisi Sfidën Pamore Globale të të Rinjve “Një botë: E ardhmja e përbashkët” në korrik, duke marrë mbi 56 000 vepra nga 51 vende, që pasqyronin këndvështrimin e të rinjve mbi Objektivat kryesore të Zhvillimit të Qëndrueshëm të OKB-së, duke përfshirë paqen e drejtësinë, arsimin, çrrënjosjen e varfërisë, veprimin klimatik dhe mbrojtjen e biodiversitetit.
Ndërsa Melisa Fleming, zv.sekretarja e përgjithshme e OKB-së për Komunikimet Globale, tha se OKB-ja do të vazhdojë të mbrojë parimet thelbësore të paqes, barazisë dhe dinjitetit të përcaktuara në Kartën e OKB-së 80 vjet më parë.
