Deputeti demokrat Eduard Halimi tha nga aula e kuvendit se opozita mbështet reformën në drejtësi, por jo draftin e qeverisë. Sipas Partisë Demokratike drafti i propozuar nga qeveria ka për qëllim që ta vërë drejtësinë nën këmbët e kryeministrit Rama. Halimi theksoi se PD po kërkon atë që edhe Komisioni i Venecias ka thënë.
“Mbështesim reformën, por jo draftin. Jo draftin sepse nuk bëhet më i mirë KLD nëse Kryeministri çon nga 3 në 5 numrin e anëtarëve që propozon. Skema e krijimit të tre institucioneve të reja është një skemë kapjeje që nuk garanton pavarësinë nga politika. Nuk bëhet më e mirë drejtësia nëse e merr ndër vete kryeministri. Këto ka thënë edhe Komisioni i Venecias, këtë kemi thënë edhe ne”, tha Halimi.
Eduard Halimi ka hedhur akuza të drejtpërdrejta ndaj kryeministrit Rama duke thënë se në mëngjes bërtet për reformë ndërsa në darkë mer në celular gjyqtarët.
“Kjo nismë është hipokrite, tipike për këtë qeveri dhe për Edi Ramën. Tipike për Edi Ramën që ditën bërtet për reformën në drejtësi dhe natën merr gjyqtarët në telefon dhe u thotë se çfarë vendimi duhet të marrin. U bërtet kur lirojnë të pamundurit dhe i përkëdhel kur lirojnë hajdutët, kontrabandistët dhe kriminelët”, tha Halimi.
