Pas përfundimit të takimit mes grupit të ekspertëve të Komisionit të Venecias dhe përfaqësuesve të mazhorancës dhe opozitës, përfaqësuesi i kësaj të fundit, deputeti demokrat Eduard Halimi tha se është për të ardhur keq që dy kampet politike nuk erdhën me një produkt të përbashkët për reformën në drejtësi. Sipas Halimit, përgjegjëese për këtë situatë është mazhoranca, pasi sipas tij ajo dështoi që të kryejë një proces transparent dhe të paanshëm.
“I shpreha keqardhjen që mazhoranca dhe opozita nuk erdhën me një produkt të përbashkët, por kjo për shkak të dështimit të mazhorancës për të kryer një proces transparent dhe të paanshëm.” Tha Halimi.
Halimi ka shtuar duke thënë se grupi i ekspertëve të Komisionit të Venecias u shqetësua edhe për problematikat e ngritura nga opozita në lidhje me draftin e qeverisë, i cili parashikon mosndërhyrjen e Gjykatës Kushtetuese në ndryshimet që do ti bëhen dokumentit të shtetit, por edhe pamundësisë së gjyqtarëve që të apelojnë vendimet që do të meren kundrejt tyre.
“Lidhur me përmbajtjen, ekspertët tanë bënë një pasqyrim të të gjithë vëretjeve që ne kemi të amendamenteve të paraqitura nga mazhoranca dhe alternativave që ne japim në lidhje me këtë. I shprehëm gadishmërinë tonë për një reformë konsensuale transparente dhe gjithpërfshirëse. Një reformë që duhet të luftojë korrupsionin në drejtësi, por që kjo luftë njëkohësisht të garantojë pavarësinë. Ekspertët shprehën shqetësimin për heqjen e së drejtës së ankimimit, heqjen e së drejtës së gjykatës kushtetuese që nuk mund të shprehë mendimin e saj për ndryshimet e kushtetutës.” –vuri në dukje Halimi.
Ai tha se PD i ka dorëzuar ekspertëve të Komisionit të Venecias dhe një version të fundit duke shprehur zgjidhjen alternative për reformën në drejtësi.
