Që kandidati Kosova po bën një fushatë në të cilën përpiqet ta “fshehë” sa më shumë kreun aktual të bashkisë Lulzim Basha, kjo tashmë është diçka që duket prej së largu. As Basha dhe as Berisha nuk janë pjesë e fushatës së Tiranës dhe ky është një paradoks unik, të paktën sa i përket Lulzim Bashës. I cili nuk ka guximin të dalë e të mbrojë mandatin e tij të punëve në krye të qytetit, pas katër vjetësh në detyrë.
Dje Kosova duket se ka lëshuar një shigjetë të helmët ndaj kreut të opozitës. “Bashkia e Tiranës e ka një të keqe, se i nis gjërat dhe nuk arrin t’i përfundojë”, është shprehur ai në një takim elektoral në zonën e Farkës. Kurse duke folur për Ramën, Kosova ka vijuar të përdorë taktikën e zgjuar të profilit të ulët të deklaratave. “Unë e kam vlerësuar dhe ai më vlerëson. Ku ka fat më të madh një kryeministër të bashkëpunoj me mua. Nëse një njeri të bind për të punuar duhet të bashkëpunosh”, tha Kosova
