Kreu i Bashkisë së Kukësit dhe njëherësh edhe kandidati i mazhorancës për këtë Bashki Hasan Halili i është përgjigjur në distancë akuzave të bëra nga deputeti Ben Blushi.
Ky i fundit e vuri në qendër të vëmendjes madje duke etiketuar fenomenin e kalimit nga një parti në tjetrën si “hasanizim”. Në një intervistë për gazetën Mapo, Halili shprehet në reagimin e tij se Blushi as që ia ka idenë se çka bërë ai për Kukësin.
Sipas kryebashkiakut, Blushi është një mjeshtër i fantazisë ndërsa ai një kokëulur. Dhe për Halilin, deputeti i PS nuk e ka me të personalisht por me një nga zyrat e Bulevardit të Tiranës.
“Shpesh ju që flisni nga Tirana si gazetarë apo si politikanë, nuk po i përfshij të gjithë në këtë mendim, ju duket se Shqipëria fillon maksimumi tek korpusi i Universitetit e mbaron tek ish-stacioni i trenit. Shpesh ju keni lehtësinë e atij që flet për gjithçka e çdo gjë pikërisht sepse nuk dinë asgjë me themel. Ky natyrisht nuk është rasti i deputetit Ben Blushi të cilin unë e çmoj. E di që ai as më njeh dhe as e ka idenë se çfarë kemi bërë këtu në Kukës bashkë me një staf të ngushtë profesionistësh dhe një rreth të gjerë dashamirësish për të përmirësuar jetën në qytet. E përdori emrin tim sepse i duhej për betejën e tij që nuk e ka me mua, por e ka me një nga zyrat në Bulevardin e Tiranës. Dhe gaboi. Gaboi edhe në kohë, edhe në hapësirë. Gaboi në kohë sepse unë jam larguar nga pushteti për të shkuar në opozitë. U largova nga PD dhe militova në LSI kur kjo parti ishte në opozitë. Po të kisha parë llogarinë time të vogël, do të kisha qëndruar aty ku isha. Është ndryshe nëse çon votat nga opozita në pushtet dhe ndryshe e anasjellta. Veprimi i dytë ka moral, është një veprim që bëhet për moral dhe i bindet moralit.Blushi gabon dhe në hapësirë sepse duke mos e njohur Kukësin, e paragjykon atë duke i besuar fantazisë së tij. Dhe këtu dalim tek diferenca mes nesh: ai është mjeshtër i fantazisë dhe fjalës, unë jam punëtor kokulur i fjalës së mbajtur dhe punës së ndershme.” u shpreh Halili
